Washington, K’lyngkot:
Katkum ki khubor, la ong ba utei u Principal ka Iowa uba la len lade tang ban pyllait im ia ki khynnah skul ha ka por ba jia ka jingsynreit kuli naphang hapoh katei ka skul, u la khlad noh pat ha kane ka por namar ki jingmynsaw bad jingshitom na ka jingksam ki kuli ha katei ka jingjia.
La ong ba u Dan Marburger, uba la don 56 snem ka rta, u la shah siat bad shah synreit kuli naphang ha ka 4 tarik jong une u Kyllalyngkot hadien ba uwei u khynnah 17 snem na katei hi ka skul, u la synreit kuli naphang sha kat kiba don ha katei ka skul ha ka por mynstep katba dang thmu ban pyniaid ia ka jingai jinghikai kumba ju long man ka sngi.
Ha katei ka jingjia, uwei u khynnah 11 snem ruh u la khlad noh bad 6 ngut kiwei pat ki khynnah skul ki la mynsaw na ka jingleit dei kitei ki kuli ba la synreit da utei u khynnah 17 snem. Katba, la ong pat ruh ba utei u khynnah 17 snem uba siat ruh, u la khlad lang noh ha katei hi ka jingjia namar ka jingwan phai bad jingsied ruma jong ki kuli katba u dang siat naphang ha katei ka jingjia.
Kane ka la jia ha ka por kumba 8 baje jong ka step 14 tarik u Kyllalyngkot bad ka la dap 10 sngi ha kane ka sngi ba utei u Nongialam jong katei ka skul u la khlad noh syndon katba u dang iaksaid ban lait na ka jingïap ha kine ki 10 sngi ba la leit naduh ba u la mad ia ki jingshitom bad jingmynsaw ba jur ha ka met jong u.
Ka tnat Department of Public Safety ha ka sngi ba bud jong katei ka jingjia ha k 15 tarik u Kyllalyngkot, ka la ïaroh bad ai khublei ia ka jingkloi ban len lade jong utei u nongialam skul ha kaba u la kloi ban shah da lade bad ban iada ia kitei ki khynnah skul jong u ha kum katei ka jingjia kaba shyrkhei bad kaba kham ñiar kin don kum kitei ki nongialam ki ban kit khlieh ia ka jingsuk- jingshngaiñ jong ki khynnah bad ki riew paidbah ha kum kitei ki khep.
