Tura, K’Lyngkot 16
Ki ar ngut ki nongïalehkai ba kynsai ka Jylla kata u Renaldi Dhar na West Jaiñtia Hills bad ka Angelina Jackson na East Khasi Hills ki la lah ban pynpaw ïa ka jingtbit naba ki la long kiba stet tam ha ka jingïakob mareh 100mts ha ka sngi kaba ar jong ka 5th Meghalaya Games 2024.
Athletics: Ha kane ka jingïakob mareh, u Renaldi u la lah ban pyndep ïa ka thong ha 11:04 sekhon, katba u Gracewin CH Marak (SWGH) u la lah ban pyndep ha ka 11:06 sekhon bad u Pilo Ronghang u la wan ba-lai ban pyndep ïa thong ha ka 11:07 sekhon.
Katba ha ka liang ki kynthei, ka Angelina Jackson ka la lah ban rah ïa ka nam jop hadien ba ka la pyndep ïa ka thong ha ka 13:06 sekhon, ba wan ba-ar dei ka Savinity Jyndiang (WKH) kaba la pyndep ha ka 14:02 sekhon kaba jan ïaryngkat lang bad ka Ibaïahun Kurbah (SWKH) kaba la lah ban pyndep ha ka juh ka por.
Ha kane ka sngi kaba sdang kumba 6 tylli ki jingïalehkai la lah ban pynlong. Ha ka jingïakob mareh 1500m, u Skhemlang Suba u la khur ïa ka takma ksiar hadien ba u la pyndep ïa ka thong ha ka por 4:04:7 sekhon bud pat sa u Dabit Dkhar uba la wan ba-ar hadien ba u la pyndep ïa ka thong ha ka 4:08:9 sekhon, katba ka takma rnong ka leit sha u Banjoplang Wanñiang hadien ba u la pyndep ïa ka thong ha ka 4:09:0 sekhon.
Haba phai pat sha ka liang ki kynthei ha kane ka juh ka kyrdan ïakhun, ka nam jop ka leit sha ka Glorify Kurbah na East Khasi Hills kaba la pyndep ïa ka thong ha ka 5:04:1sekhon, katba ka takma rupa bad rnong la khur da ka Daphlin Wahlang bad ka Balasiewdor Pathaw (SWKHD) kiba la pyndep ïa ka thong ha ka 5:13:5 sekhon bad 5:20:3 sekhon.
Ha ka High Jump jong ki shynrang, ïa ka takma ksiar la khur da u Primus Ronghi ka Ri-Bhoi hadien ba u la lah ban kynthih haduh 1.90M, katba ka takma rupa bad rnong ka leit sha u Pringchang N Sangma ka Williamnagar bad Simeon Marak ka North Garo Hills.
Ha ka liang ki kynthei, ki nongïalehkai ka Ri-Bhoi ki la paw bha shakhmat tad haduh ba kin da ïoh ban khur ïa ka takma ksiar bad rupa. Ha kane ka kynti ba mynta, ka Rinalgi Ingti (1.55 M) bad Andrisha Klien (1.45M) ki la khur takma ksiar bad rupa, ka takma rnong ka leit sha ka Roshni Ch Marak (Williamnagar).
Kumta ha kaba kut jong ka sngi kaba nyngkong ka kynhun ïalehkai jong ka Ri-Bhoi ka la ïoh ban khur haduh 3 tylli ki takma ksiar bad mar kawei ka takma rupa bad rnong. Nangta la bud pat sa ka kynhun ïalehkai ka East Khasi Hills kaba la khur 2 tylli ki takma ksiar bad sa kawei takma ksiar la khur da ka West Jaiñtia Hills.
Wrestling: Lada phai pat sha ka jingïalehkai lympat ha ka Women Freestyle jong ka jingkhia 45kilo, ka Ribhalang Sun na East Khasi Hills ka la khur ïa ka takma ksiar, katba ïa ka takma rupa ka khur da ka Rikyntiew Nongrum kaba na East Khasi Hills.
Ha ka Freestyle jong ka jingkhia kaba 48 kilo, ka Scolastica Rymbai na East Khasi Hills ka la khur ïa ka takma ksiar, katba ïa ka takma rupa la khur da ka Ibakordor Jyrwa na East Khasi Hills.
Badminton: ïa kane jingïalehkai la lah ban pyndep haduh ka semi-final ha kaba Nitania Tariang (EKH) ka la jop ïa ka Sengte W.D Shira (WGH) da 21-12, 21-8, ka Shimtihun Lyngdoh (WKH) ka la lah ban pynliem ïa ka Nihaka Lamare (WJH) da 21-12, 21-15.
Ha ka jingïakhun jong ki shynrang u Raynel Kharbuki (RKH) u la lah ban pynliem noh ïa Raymond Ronghang (RBD) da 21-10, 21-15, U Stephan Marweiñ (EKH) u la jop ïa u Mewanlamkupar da 18-21, 21-19,21-14.
Ha ka jingïalehkai ‘doubles’ jong ki kynthei, ka Shimtihun Lyngdoh bad ka D Kharbani (WKH) ki la lah ban pynliem noh ïa ka N.A Sangma bad SWD Shira (WGH) da 21-12, 21-10. Katba ka Nitania Tariang bad Carlynda Nongbri (EKH) ki la lah ban pynliem noh ïa ka D Lyngdoh bad D. Ryngkhlem (WJH) da 21-8, 21-18.
Haba phai pat sha ka jingïakhun ki shynrang, u B. Lamare bad L. Suchiang ki la jop ïa u Gaurav Dutta bad u Biswajit Ghosh 21-19, 21-17, katba u Raynel Kharbuki bad P Mazumdar (EKH) ki la pynliem noh ïa u Babrian bad Raymond (Ri-Bhoi) 21-8, 21-11.
