Mawkyrwat, K’Lyngkot 16
Ka Mawten Sports Club ka la sdang ïa ka Mawten IV T20 Cricket Tournament 2023-24 ha ka sngi Ba-ar ha madan Mawpyllun Mawten ha kaba ka Mawmitbah SC ka la khur ïa ka jingjop hadien ba ka la lah ban pynliem noh ïa ka Kingfisher United CC da 13 run.
Ïa kane ka lumpung la plie da u Bah Johnfilter Lyngdoh, District Presi-dent NPYF kum u kongsan uba dei uwei na ki samla rangbah ba ju kit bad trei ïa ki kam imlang sahlang hapoh ka dong ka thaiñ, ha ryngkat ka jingïadonlang u Bah Bakhaiñ Nongsiej, Secretary SWKHDCA, ki riewrangbah jong ka shnong, ki nongïalam bad ki dkhot jong ka klob.
Ha kane ka lympung la wan ban ïashim bynta da ki 20 tylli ki kynhun na kylleng ka Jylla bad haba kheiñ lang ïa ka khusnam ka long T. 60,000 hajar tyngka.
Ha kane ka sngi jingsdang jong kane ka lympung, ka Mawmitbah SC ka la jop ïa ka jingkynting pisa bad ka la jied ban tied nyngkong ha kaba ka la kamai 108 run na ki 20 overs bad shah pynhap 8 wiket.
U nongtied uba la ïoh bun run tam u dei u Sarboklang Jana uba la tied 31 run, katba na ki nongbol ka Kingfisher United u Kyrshankupar Pdahsiej bad u Wanpydap Lyngdoh ki la ïoh ban khur mar 2 wiket.
Ha ka kynti ban beh ïa ka thong, ka Kingfisher United CC ka la lah ban kamai 95 run na ki 19 overs bad hap noh baroh 10 ki wiket. U nongtied ba la ïalehkai bha u dei u Kyrshankupar Pdahkasiej jong ka Kingfisher United uba la tied 23 run, katba u Rifuljen Wanñiang u la ïoh ban khur 3 wiket.
