Mawkyrwat, K’Lyngkot 16
Ka Thaiñ ban Kyntiew Youth & Social Welfare Organisation (TBKY&SWO) ha ryngkat ka jingïatreilang bad Meghalaya AIDS Control Society Shillong ha ka 15 tarik ka la pynhap pyrda noh ïa ka lympung ïalehkai phutbol ba la tip kum 8th Invitation Football 2023-24 ha madan Ersaikohpoi, Ngunraw ha kaba ka Chi Ïongmut ka la long ka lahduh hadien ba lah pynliem ïa ka NYCA da 2-1 kol.
Kum ban shu kdew kane ka dei ka sien kaba 8 ba ba ka seng Thaiñ Ban Kyntiew Youth & Social Welfare Orasinsation ka la ïoh ban pynlong ïa ka taiew lehkmen ki samla naduh ka jingïalehkai phutbol, ka Gospel Con-cert, ki jingshad bad jingrwai kum shibynta ban ai jinghikai ïa ki khun samla ba kin lait na ki kam sniew kum ka jingdih kyiad, dih drok bad shang kha pathar khnang ba kin lait bad lah ban ïada ialade na ka jingpang HIV kaba la sdang kynrei ha kane ka dong ka thaiñ.
Ïa kane ka lympung la wan ban pynhap pyrda da u Bah Teibor Basan kum u kongdan bad ka Kong Daphisha Pyngrope kum ka sumbud kongsan ha ryngkat ka jingdonlang u Myntri Shnong Bah Dminglan Thingni, Bah John Ïawphniaw, President ka seng bad kiwei kiwei.
