Tura, K’Lyngkot 17
Wat la ka lympung ïalehkai 5th Meghalaya Games 2024 ka la ïai bteng ha Tura, hynrei ki la don katto katne ki jait jingïalehkai kiba la poi noh sha kaba kut ha ka sngi Balang.
Kine ki kynthup ïa ka Karate, Badminton, Swimming, Gymnas -tic bad ka Golf. Na baroh kine ki jingïalehkai dei ka East Khasi Hills District kaba la lah ban khur kham bun tylli ki takma.
Badminton: Ka kynhun ki ‘rang bad ki ‘thei ïalehkai na East Khasi Hills ki la khur bun tylli ki nam jop. Ha ka jingïalehkai para marwei jong ki kynthei, ka Netania T. tariang ka la lah ba kan pynliem noh ïa ka Shimtihum Lyngdoh ka West Khasi Hills, katba ïa ka takma rnong la khur da ka ‘thei ïalehkai kaba na West Khasi Jaiñtia Hills bad ka West Garo Hills. Ha ka jingïalehkai doubles jong ki kynthei, ka nam jop la khur da ki shijur ki ‘thei ïalehkai ka East Khasi Hills ba la mih madan da ka Netaniya bad ka Caralinda Nongbri hadien ba ki la lah ban pynliem noh ïa ka Shimtihum bad ïa ka Doreenzia Kharbani bad ïa ka takma rnong na kane ka jingïakob la khur da ki shijur ki ‘thei ïalehkai jong ka West Jaiñtia bad West Garo Hills.
Katba ha ka jingïalehkai ki shynrang jong ka jingïakhun para marwei (singles) u lahduh dei u Reynel Kharbuki hadien ba u la lah ba un pynliem noh ïa u Stephan Marweiñ bad baroh arngut ki dei jong ka East Khasi, ka takma rnong na kane ka kyrdan ïakhun ka leit sha ki rangïalekai jong ka Eastern West bad Ri-Bhoi, ha ka jingïalehkai kaba shi jur (doubles) u Reynel uba la mih madan lang bad u Prathan Majumdar ki la lah ban pynliem noh ïa u Banshabor Lamare bad Lechan Suchiang (Ribhoi), katba ka takma rnong la khur da ki nongïalehkai ka West Garo Hills.
Wushu: Ha ka jingïalehkai kaba la long ha Don Bosco School la khur jingjop da ki district bapher bapher, watla ka East Khasi Hills ka dang dei ka district kaba la lah ban khur bun tylli ki jingjop.
Tad haduh ban da wanlam ïa kane khubor ka East Khasi Hills district ka la khur khyndai tylli ki takma ksiar ha ki kyrdan ïalehkai bapher bapher.
Ha ka Sub Junior Boys (45 kg), ïa ka takma ksiar la khur da ka Eastern West Khasi Hills hadien ba la la lah ban pynliem noh ïa ka West Khasi Hills. Katba ïa ka takma rnong la khur da ka East Khasi Hills bad ka South West Khasi Hills.
Ha ka Sub Junior Boys (35 kg), ka East Khasi Hills ka la jop ïa ki nongïakhun kiba na South West Khasi Hills bad ïa ka takma rnong la khur da ka Ribhoi.
Ha ka Junior Boys (45 kg), ka South Garo Hills ka la khur ïa ka takma ksiar hadien ba ka la jop ïa ka West Khasi Hills, katba ïa ki takma rnong la khur da ka East Khasi Hills bad East Jaiñtia Hills.
Ha ka liang ka Senior Men (45 kg), ka Eastern West Khasi Hills ka la lah ban pynliem noh ïa ka East Khasi Hills.
Ha ka Junior Boys (45 kg), ka North Garo Hils ka la jop ïa ka South West Khasi Hills. Ïa ki takma rnong la khur da ka West Khasi Hills and East Khasi Hills.
Ha ka Junior Girls (45 kg), ka East Jaiñtia Hills ka la khur ïa ka takma ksiar, katba ka West Khasi Hills ka la khur ïa ka takma rupa. Ïa ka takma rnong la khur da ka Ribhoi bad ka West Goaro Hills.
Ha ka junior boys (48 kg), ka West Khasi Hills ka la khur ïa ka takma ksiar hadien ba ka la lah ban pynliem noh ïa ka Eastern West Khasi Hills. Ka East Jaiñtia Hills bad ka South Garo Hills ki la khur ïa ka takma rnong.
Ha ka Junior girls (48 kg), ka East Khasi Hills ka la khur ïa ka takma ksiar, ïa ka takma rupa la khur da ka West Khasi Hills bad ka West Garo Hills ka la khur ïa ka takma rnong.
Haba phai sha ka junior girls (52 kg) la khur da ka East Khasi Hills hadien ba la pynliem noh ïa ka West Khasi Hills. Ïa ka takma rnong la khur da ka South West Khasi Hills bad ka South Garo Hills.
Swimming: Ka Pdiangsuklang Syngwan bad u Banpynshngaiñ-lang Syngwan kiba long ruh ki ar ngut ki samla jngi um ba la mihkhmat ïa ka Jylla ha ka 37th National Games kaba la long ha Goa ba la long ha u snem ba la leit, ki la long ki ar ngut ki nongïalehkai kiba kynsai tam haduh ba kin da ïoh ban khur ïa ka nam Best Swimmer.
Ha kaba kut jong ka jingïakop lada phai sha ka jingïoh khur takma ka kynhun ïalehkai ka East Khasi Hills District ka la khur 11 tylli ki takma ksiar, 11 ki takma rupa bad 10 tylli ki takma rnong. Bud pat sa ka South West Khasi Hills District kaba la wan ba-ar hadien ba ka la khur mar ar tylli ki takma ksiar bad rupa lem bad 3 tylli ki takma rnong. Katba kiwei kiwei pat ki district kiba kynthup ïa ka Eastern West Khasi Hills, East Garo Hills District bad ka East Jaintia Hills District kim shym la lah satia ban ïoh khur takma.
Gymnastic: Ki nam tam na nongïalehkai ba kynsai (all round champion) ha kane ka lympung ki long ba ha ka liang ki shynrang dei u Mebantei Lyngdoh Mar-shillong bad ka Wansuk Merry Susngi, katba ka Wandalang B. Malngiang ka la ïoh ba kan rah ïa ka nam ha ka kyrdan jong ki senior.
Wrestling: Ha kane ka ïakop ka khubor ka jingmih paw jong ka sap ba nylla ka long na ka Ringchi K Sangma na Upper Wadanang, West Garo Hill, ka khynnah kaba dang 19 snem ka rta bad kaba pule ha Govt. Boys HSS.
Kane ka nongïalehkai ka dang shu sdang ban pynleit jingmut ha kane ka jingïalehkai hadien ba ka la pynïasnoh ïalade bad ka Wrest-ling Association of WGHD kaba don tang kumba 23 ngut ki nongïalehkai bad ba dang shu seng artad ïa ka dang shi bnai mynshwa.
Ka Ringchi, ka la ïoh ïa ka jingshah hikai ha ki coach jong ka synjuk bad dei tad ha ka sngi Ba-ar ba ka la ïoh ban ïashim bynta na ka bynta ban pynpaw ïa la ka jong ka sap ïalehkai ba kyrpang jong ki.
Karate: Ka kynhun ïalehkai jong ka East Khasi Hills District kynthup ïa ki kynthei bad shynrang ki la ïoh ban khur mar san tylli ki takma ksiar.
Ha ka liang ki shynrang, ka East Khasi Hills ka la khur mar saw tylli ki takma ksiar bad rupa bad saw tylli ki takma rnong, katba ha ka liang ki kynthei ki la ïoh ban khur san tylli ki takma ksiar, saw tylli ki takma rupa bd khyndai tylli ki takma rnong. Katba ka kynhun jong ka West Jaiñtia Hills District ka la wan ba-ar ha ka liang ki kynthei bad shynrang da kaba khur mar kawei ka takma ksiar bad rupa. Ka West Khasi Hills ka la wan balai hadien ba ka la khur tang kawei ka takma ksiar.
