Ka ai jait kmie ne kynthei ka pynmih ka kynrum kynram ha ïing ha sem hapdeng u tnga bad ka tnga bad ka kur ka jait ruh. Ka mih ka jingïapait jingïapra khiew ja hapdeng u kpa bad ka kmie. Sa mih bun ki longïing longsem kiba kit khunrei na ka daw ba ïapher jingmut u kpa ki khun bad ka kmie ki khun. Tip na kaei ka daw ba mih kum kine kiei kiei hapdeng u tnga bad ka tnga. Hato ym dei na kane ka rukom shim jait na ka kmie? Bun kiei kiei ki mih na ki kynthei.
Haba phai ha ka khana u Samson mynhyndai bad ka Delilah ruh dei na ka Delilah ba ka wanrah ka jingshah kem u Samson ha ki Philistia. Dei na ki kynthei ba sa bun byllai kane ka shongkha khlieh bad kiwei ki jaitbynriew bym dei Khasi. Kumno phin ong ka dei ka ri Tip kur Tip kha. Ka Tip kur tip kha tang haba ioh pisa ha bym ioh pisa ki khalah da u prah shapoh niamra. Wat ka kmie u Tirot Sing ka shet kylla ïa la u khun da kaba ka leit ïathuh ha ki nongshun ba u khun un sa beh krad ïa u Dabid Scott bad ki shipai jong u. Kane ruh ka dei na ka kynthei. Ne phi ong nga shu thaw bad kren lamler shaphang kane ka rukom shim jait na ka kmie. Ka shim jait na ka kmie ka wanrah shibun ki kynrum kynram ha ki longïing longsem bad ha ka Jaitbynriew.
Kumta ka Hima Mylliem ka la thaw ïa ka aiñ ba dei tang ki rangbah ki ban ïoh ban jied ïa u Sordar ne Rangbah. Namar ki kynthei ki lah ban wanrah ka jingbym ïa sngewthuh jingmut hapoh shnong hapoh thaw. Wat ka ktien u Blei ne Bible kim ju ai lad than ïa ki kynthei ban ïuhroit halor u rangbah. Kumta na kine kiei kiei ka shong jia ba ka shim jait kheiñ jait na ka kmie ne kynthei ka wanrah bun ka kynrum kynram ha ka imlang ka sahlang. Kane ka long ka jing-iohi jongngi kum ki riew paidbah kaba ïadei bad kane ka ai jait kmie ne kynthei.
C. B. Iawphniaw
