Tel Aviv, K’lyngkot:
Ka Israel ha ka Sngi Nyngkong, ka la ong ba ka jingleit hiar thma pyrshah ia ki lehnoh Hamas hapoh Gaza ka lah ban kut noh shen bad kane ka long ruh hadien ba ki heh jong ka United Nations ki la kyntu jur ia ka Israel ba kan sangeh noh ia ka thma namar ka jingeh bad jingktah kaba jur ia ki paid nongshong shnong ba lui-lui jong ki paidbah nongshong ka Palestine kiba don hapoh Gaza.
Kumjuh ruh na ka liang ka kynhun lehnoh Hamas, ha katei ka sngi ka la pynbna ba 2 ngut na kiba la shah rahbor bad shah set ha katei ka kynhun lehnoh, ki la khlad noh ha ka jingther bom jong ki shipai ka Israel. Pynban na ka liang ka Israel ka la kyntait war ia katei ka jingkynnoh bad ong ba ka long tang ka jingda rapjot jong ka Hamas namar ka la dep ban pyniap hi da lade ia kitei ki briew kiba ka rahbor na Israel.
La ong ba ka jing-iakhun thma jong ka Israel ka la neh mynta la katto-katne bnai naduh ba ki lehnoh Hamas ki la leit hiar thma ia ka Israel ha ka 7 tarik u Risaw 2023. Kane ka jingleh jong ki lehnoh Hamas ka la pynlong ia ka Israel ba kan khie bitar bad ban kput ia ka Gaza haduh ba kan da um bad jot thiaw kumba ka long mynta.
Ka Israel naduh katei hi ka por ka la smai ba kan pynhiar kput bad kan pynum ia ka Gaza namar ka jingleh dusmon jong ki lehnoh Hamas da kaba rahbor, leh bor bad batbor dusmon ruh ia ki khynnah bad samla kynthei jong ka Israel. Namar kata, ka Israel ka la smai ba kan kput bad kan pynduh jait syndon ia katei ka kynhun lehnoh khnang ba kan nym lah shuh ban khie khlieh biang hadien- habud bad ban lait ruh na ki jingma kiba ap na katei ka kynhun lehnoh ba shyrkhei jong ka Palestine.
Kumta ki shipai ka Israel khlem da aili ia ki lehnoh Hamas, ki la ther bom naphang sha ki nongbah Yunis bad Rafah sha ka phang South jong ka Gaza Strip mynta la kumba katto- katne taiew bad ki shipai Israel ki la iathuh ruh ba baroh ki ktem bad ki jaka treikam jong ki lehnoh Hamas kiba don ha kitei ki bynta ki la um bad julor lut.
