Shillong, K’Lyngkot 17
Ka kynhun ïalehkai phutbol U-19 ka Jylla ka la mih na ka nongbah ban leit ïashim bynta ha ka Khelo India Youth Games 2024 ka ban long ha Tamil Nadu.
Hashwa ba kane ka kynhun kan mih na ka nongbah, na ka liang ka Meghalaya Football Association (MFA) ka la pynlong ïa ka jingïalang kaba lyngkot ha ka Sngi Ba-ar ha madan Third Ground, Polo na ka bynta ban ai kitbok kitrwiang ïa kane ka kynhun ba kan lah ban ïalehkai bha khnang ban kynjoh sha ka thong.
Ha katei ka sngi la ïadonlang u President ka synjuk u Bah Hamletson Dohling, kumjuh u Bah Ailad Kynta, Bah Freddy Kharpran, Bah Cliff Nongrum bad Khlaiñ Pyrkhat Syiemlieh bad kiwei.
Lah ban pynkynmaw ba ka Meghalaya ka la ïoh rung sha ka semi final ha u 2022 bad kumjuh ha u 2023 hadien ba ka la shah rem noh ha ka Kerala na ka bynta ban pynlong ïa ka kynhun ïalehkai Jylla ba kan khur ïa ka takma rnong.
Ha kane ka lympung kin don haduh 5,600 ki nongïalehkai na kylleng ka ri ki wan ïashim bynta ha kane ka lympung ka ban sdang naduh 19 haduh 31 tarik mynta u bnai.
Ïa kane ka kynhun kaba don 20 ngut ki rangïalehkai yn ïalam da u Coach u Bah Jeffrey Warlarpih bad u Beneslaus Khyriem kum u Manager. Kiwei pat ki kynhun ki ban ïashim bynta ki long ka Uttar Pradesh, West Bengal, Punjab, Jharkhand, Odisha bad ka Goa.
Ki kyrteng ki rangïalehkai ki kynthup ïa u Kangkam G. Momin, Babitlang Wah -lang, Chibaitki Pamthied, Colinsalmon Lyngdoh, Teibok Nongrum, Mebanaibok Kharbudnah, Easter Selchang Ch Sangma, Deibormame Tongper, Da-o-hipaia Rym-bai, Badondor Marbaniang, Rimankhraw Kharumnuid, Firstborn Roy Khongsit, Mebannangkiew Thabah, Wanboklang Wahlang, Bipiush G Marak, Bantiplang Khongnoh, Mebanlamlynti Marsharing, Ronald Kharkongor, Samchaphrang Lato bad u Khaiñkupar Ïawphniaw.
