Mumbai, K’lyngkot:
Ka kynhun Maharashtra Anti-Terrorism Squad (ATS) ka la dap da ka jingsngewlyng-ngoh ban shem ba ka khubor pyntriem halor ka jingbuh bom ba la phah sha ki Museum kiba don ha kylleng ka ri, kynthup ha ki jaka pule kiba don ha Mumbai ka dei kaba la leh da u khynnah uba dang 12 snem karta uba dei na Assam.
Kumba la ïathuh ka tyllong khubor, la ong ba u briew u bym shym la tip kyrteng uba nabar ri u la ïakren bad une u khynnah bad la ngeit ba kane ka jing-leh jong u ban phah ïa kine ki khubor pyntriem ka dei na ka bynta ka pisa bad ka jingkwah ban pynleit por ne pynsngewtynnad ïa u.
Ki heh jong ka kynhun kim pat tikna ha kaba ïadei bad kane ka kam naba ka la don tang ka jingïakren lyngba ka dur-khih (video) hapdeng jong ki, bad kumta ki la rai ba kin ym pynshitom ei ei namar ba u dang rit ka rta.
Ha ka 5 tarik, Kyllalyngkot, kiba bun na ki Museum ki la shah byrngem shah pynbthei bom lyngba ki Email. Kine ki kynthup ïa ka Chhatrapati Shivaji Maharaj Vastu Sangrahalaya ha Colaba, ka Nehru Science Centre ha Worli, ka Byculla Zoo bad Mani Bhavan Gandhi Sangrahalaya napdeng kiwei pat.
Ki pulit ka thaiñ ha ka por ba biang ki la pynkhlaiñ ïa ki jingleit khmih bniah bad pyntreikam ruh ïa ki ksew sma dien bad kumjuh ka jingïatreilang ki pulit ka kynhun ATS ha kylleng ka nongbah Mumbai.
Hadien ka jingwad bniah kaba ar sngi la shem ba ym lap ei ei, ki heh pulit ki la ñiew ba kine ki dei ki khubor thok.
Ha ka jingïatreilang bad ki pulit ka Colaba, ka kynhun ATS ka la pynlong ïa ka jingtohkit bad ka la long kaba jop naba la lap ïa ka IP Address ha lyndet jong kine ki khubor pyntriem ba la phah lyngba ki Email.
Ka kynhun ka la leit sha Assam bad hadien ba la tohkit bniah la lap ba une uba phah khubor u dei u khynnah bad u la pyndonkam da ka Laptop jong ka hynmen jong u ban shna bad ban phah ïa kine ki khubor pyntriem.
Ki heh pulit ki la kyntu ïa ki kmie ki kpa ba ki dei ban sneng bad pyni bha ba un ïaid ha ka lynti kaba dei ïa une u khynnah hadien kane ka jingjia.
