Tura, K’Lyngkot 17
Ka kynhun ki nong-ïalehkai athletics ka West Jaiñtia Hills, ki la lah ban pynpaw ïa ka jingtbit ha ka sngi kaba ar jong ka jingïalehkai Athletics ha ka 5th Meghalaya Games 2023 kaba la long ha Pa Togan Nengminza Athletic Stadium, Tura.
Haduh kaba la kut jong ka sngi kaba ar, kane ka kynhun ki nongïaleh-kai ka West Jaiñtia Hills ki la lah ba kin khur haduh saw na ki phra tylli ki jait jingïalehkai ha ka sngi Balang bad la bud pat sa ka kynhun na Ri-Bhoi kaba la ïoh ban khur sa ar tylli ki takma ksiar, katba ka South West bad ka East Khasi ki la ïoh ba kin khur mar kawei ka takma ksiar.
Ki katto katne ki jingjop ba la lah ban khur da ka kynhun ïalehkai ka West Jaiñtia ka long lyngba ka 5000Mts ki shynrang ha kaba u Dabit Dkhar u la lah ban pyndep ïa ka thong ha ka 15:53:9. Ïa ka takma ksiar bad rupa la khur ia ki da ki arngut ki ‘thei ïalehkai jong ka SWKHD lyngba ka Lyntijingkyrmen K. Jahrin kaba la pyndep ïa ka thong ha ka 19:55:2 bad Marqueenless Ramsiej (20:03:2), ïa ka takma rnong la khur ia ka da ka Happiness Phawa (WJH).
Ha ka High Jump ki khynnah kynthei, ka takma ksiar ka leit sha ka ‘thei ïalehkai ka Ri-Bhoi ka Joytiful Narlong kaba la lah ba kan kynthih haduh 4.56Mts, ka takma rupa bad rnong ka leit sha ka Savinity Jyndiang (WKH) bad Shidalin Rongpih (Ri-Bhoi).
Ha ka jingïakob mareh kaba 400m ki shynrang, u Kyrshanlang Shylla (WJH) u la khur ïa ka takma ksiar hadien ba u la lah ban pyndep ïa ka thong ha ki 50:3 sekhon, katba u Donbok Shabong (EKH) bad u Kalbin Marak (EGH) ki la khur ia ka takma rupa bad rnong.
Katba ha ka jingïakob mareh ba 400m ki kynthei, ka Retina Hanse ka la ïoh ban khur ïa ka takma ksiar hadien ba ka la lah ba kan pyndep ïa ka thong ha ki 1:01:5sekhon, ka takma rupa bad rnong ka leit sha ka Damika Lyngdoh (WJH) bad ka Albamery Sohsang (WKH).
Katba u Renaldi Dhar u la bteng ban khur sa kawei ka takma ksiar ha ka Long Jump ki shynrang hadien ba u la lah ban kynthih haduh 6:34Mts.
Hynrei ka jingjop kaba da pynkmen tam ïa ka kynhun ka West Jaiñtia ka la wan hadien ka jingjop ïa ka 4x100M Relay ki shynrang ha kaba kane ka kynhun ka la lah ba kan pyndep ïa ka thong ha ka 45.3Mts, kaba hangne u Renaldi u la lah ban lam biang ïa la ka kynhun ban pynjop ïa ka, katba ki district ba la la ïoh ban khur ïa ka takma rupa bad rnong dei ka EKH bad WGH.
Haba phai sha ka 4x100M ki kynthei, ka kynhun jong ka EKH kaba kynthup lang ïa ka Anjelina Jackson ki la khur ïa ka takma ksiar, bud pat sa ki ‘thei ïalehkai ka Ri-Bhoi bad WJH kiba la khur ïa ka takma rupa bad rnong.
