Guwahati, K’lyngkot:
U Myntri Rangbah jong ka Assam ba u heh nongïalam jong ka seng BJP ha Northeast u Himanta Biswa Sarma u la pynpep noh ïa baroh ki prokram jong u kiba dei ban pynlong ha ka 18 tarik, Kyllalyngkot bad ka 19 tarik, Kyllalyngkot ha Upper Assam na ka daw jong ka jingdon ka Bharat Jodo Nyay Yatra jong ka seng Congress.
Ïa kane la pynbna hi da u Myntri Rangbah ha ka sngi Ba-ar ha ka jingïakren bad ki nongthoh khubor ha Guwahati.
“Nga la pyndam lut ïa baroh ki prokram jong ka Upper Assam kiba dei ban long ha ka 18 bad 19 tarik Kyllalyngkot,” la ong u Sarma.
“Nga la don ka prokram ba la dep ban buh lypa kaba dei ban long ha ka 18 tarik, Kyllalyngkot ha Majuli, hynrei haba pyrkhat ba kan sa buh jingeh na ka bynta ka distrik, nga la rai ban pynkynriah tarik noh ïa ka prokram ha Majuli. Kumjuh ha ka 19 tarik, Kyllalyngkot ruh nga la buh ka prokram ban leit sam ïa ki Ration Card ha Jorhat bad ha Dergaon, ha kaba ïa kane ruh nga la pynsangeh shwa,” la ong u Sarma.
U Sarma u la ong ba u la pynsangeh noh ïa kine ki prokram ha baroh ar tylli ki tarik, namar ka jingdon jong ka Bharat Jodo Nyay Yatra jong ka seng Congress, ha kaba ka la dei ban wan ha Assam na Nagaland mynta ka sngi ka 18 tarik.
Kane ka dei ka dak jong ka jingpyrkhat babha na ka liang jong u na ka bynta ka seng Congress.
U Myntri Rangbah jong ka Assam u la bynrap shuh shuh da kaba ong ba um kwah ban don kano kano ka jingïakynad ha kane ka por ba ka seng Congress ka pynlong ïa ka Yatra namar u la pyrkhat ba ki bor sorkar ki dang bunkam bha ha kaba ïadei bad ka jingdon jong ka Yatra ha kine ki sngi ba la buh.
