Mawkyrwat, K’Lyngkot 17
Ka Golden Lion Football Club ka la jam sha ka semi final ha ka Mawlangwir Football Invitation Tournament 2023- 24, hadien ba ka la lah ban pynliem noh ïa ka Langsning FC da 1-0 kol ha ka sngi Balang ha madan Rowell Lyngdoh Stadium kaba ha Saitsnad, Mawlangwir.
Haba phai sha kane jingïalehkai ka la long shisha kaba itynnad haduh katta katta. Ka Langsning FC naduh ka kylla step haduh bakut jong ka kylla miet, ka la pyni shisha ïa ka sap ïalehkai kaba itynnad bad ïoh shi bun ki kabu ksiar ban thep kol, hynrei kam shym la lah ban pynkhih jar.
Dei ha ka minit kaba 34 jong ka kylla step ba ka Goldeon Lion ka la ïoh ban thep shi kol lyngba ka free-kick ba la shut da u Hikai Bareh. Kane ka shi kol ka la biang pura na ka bynta ban khur syndon ïa ka jingjop. U Bareh u la ïohpdiang ruh ïa ka nam Man of the Match.
Ka Golden Lion FC lyngba kane ka nam jop kan pynkhreh ïa ka jingïakhun semi final pyrshah ïa ka kynhun ka ban jop hapdeng ka 7 Wasa FC bad ka Aphuyemi FC.
