Imphal, K’lyngkot:
Shi sngi hadien ba ka la don ka jingpynjari ïa ka Curfew ha Tengnoupal distrik, kaba don ha Manipur, ka la don ka jingïasiat kaba la mih ha ka step jong ka Sngi Balang, ha kaba ki shipai ïada ri ki la ïasiat markylliang bad ki suba lehnoh Kuki ha Moreh ka jaka sor kaba don ha Moreh. Ka jingïasiat kaba markylliang ka la wanrah ïa ka jingïap jong u pulit Commando.
Kumba la ïathuh ka tyllong khubor, la ong ba ki suba lehnoh Kuki ki la kawang bom bad siat ïa ka jaka treikam jong ki shipai ïada ri hajan SBI Moreh. Ha ka jingpynphai kylla ïa ka jingsiat, u pulit Commando ïa uba la tip kyrteng kum u W Somorjit u la shah siat. Ki la don kumba lai ngut ki shipai jong ka IRB kiba la mynsaw ha ka jingïasiat. Uwei napdeng kine ki shipai kiba la mynsaw u dei uba la tip kyrteng kum u Md. Kamal Hussain jong ka shnong Sangaiyumpha jong ka Thoubal distrik, la ïathuh ka tyllong khubor.
Ha ka por ba la pyntreikam ïa ka Curfew ha baroh kawei ka thaiñ Tengnoual distrik, ki lehnoh ki la siat ïa ka jaka treikam jong ki shipai ka IRB hajan Ima Kongdong Lairembi, Moreh, ka jaka treikam kaba ha D Khunai hajan ka SBI, Moreh, ha ka jaka treikam jong ki pulit ka Moreh bad ha Muslim Busti, Moreh. Ka jingthombor jong ki lehnoh ka la sdang ha ka por 3:30 mynstep ha ka jaka treikam jong ki shipai ka IRB hajan Kondong Lairembi, Moreh katba ki shipai ki dang ïohthiah.
