Da ka jingbymbanse shuh, ka Joint Action Committee (JAC) kaba kynthup ïa ka Federation of Riwar Mihngi Local Dorbar ha ryngkat ki kynhun bad ki seng bapher bapher jong ka thaiñ ki la hap ban leit tur sha ka shlem treikam ka National Highway & Infrastructure Development Corporation Limited (NHIDCL) Regional Office ha Shillong ha ka 17 tarik Kyllalyngkot ha ryngkat ka jingrah ïa ki jingthoh bad ka jingpyrta pynrem ïa kane ka kompani bad ïa ka sorkar jylla ha kaba ïadei bad ka jingieh shrah ïa ka surok na Pynursla sha Dawki khlem da shna pynbha mynta la lai snem kynthih. La lai snem ki paid ka Riwar Mihngi ki la shuh ïai shah da ka jingkyrmen ba ka NHIDCL, kontraktor, sorkar jylla kin shimkhia ban pyndep ha ka por kaba biang. Hynrei haduh mynta, ka jingsyrtok namar ka surok ka dang ïaid.
Mynta, kane ka JAC ka la aipor 20 sngi ïa ka NHIDCL bad ïa ka sorkar ba kin shna pynbha ïa ka surok lym kumta kan leit ai da ka mukotduma ha Meghalaya High Court. Lehse ki paidbah ki la sngewthuh mynta ba dei sa tang ha ki ïingbishar bahalor ba ki lah ban ïoh ïa ka hok. Da kaba shu ap tang na ki nongmihkhmat paidbah bad na ki shnat treikam jong ka sorkar, imat kam poi shuh shano-shano. Ki nongshong shnong kiba shemphang, ki leit beit sha ïingbishar namar ki dang sngewdon jingkyrmen khyndiat. Lai snem ka la long kaba jrong bha ha ka jingim briew. Hynrei ka jingïaishah ka don la u jong u pud namar ka ju poi beit ka samoi bad ka aïom ba ki paidbah kin ym lah shuh tang ban shu peit bad ap.
Ha kane ka pyrthei ba mynta, ngi ïohi ba lada ym pat ïakhih ïaksar ha Shillong, ki jingdawa ba shong nongrim kim poi shano-shano. Ngi ïohi ba ka sorkar ruh ka sngap tang ynda la don ki jingïakhih kiba tyngeh bad haba ka la sngewthuh ba ym dei ban ïalehkai bad ki paidbah. Ka mynnor ka pyni bad hikai ïa kata. Namarkata, ka JAC na Riwar Mihngi ruh kam banse ban leh da ki kam ban wan pyrta shla sha Shillong namar ki paidbah ki la shu ap sah. Ngim dei ban klet ïa ka jingjia ha u snem ba la lah ha Rngaiñ ha kaba arngut ki mynsiem briew ki la khlad namar ka jingtwa ki maw bad khyndew. Ngim tharai ba kin dang don kiba kwah ban ïohi ïa kiba kum kine ki jingjia ba sngewsih namar tang kiba duh noh ïa la ki jong ki sngewthuh ïa ka jingkthang.
Imat ka NHIDCL ka klet ba kane ka surok ka ïalam sha Dawki-Tamabil kaba dei ka lynti ïaid ki kali ban khaïi pateng sha Bangladesh. Kam dei ka surok kaba malu-mala. Da ki phew hajar ngut ki hap ban shaniah ha kane ka surok na ka bynta ka jakpoh ka jong ki. Lada ka surok kam biang, ka kamai kajih jong ki paidbah ruh ka shah ktah jur. Nalorkata, ka ktah ruh ïa ki briew kiba donkam ïa ka jingshah sumar sha Shillong bad kiwei ki jaka. Ban shong kali ha ka surok sniew, ka ktah shikatdei ïa ki briew ki bym don hapdeng ka met kaba koit. Ha kajuh ka por, ka ktah ruh ïa ka jingleit jingwan ki nongjngohkai pyrthei. Tang ka jingduh suda kat shaba phai. Lada ka long ha kane ka dur, ka sorkar ka la dei ban ym ai ïano-ïano ban shna ïa ka surok bad ban pynneh beit ïa ka surok barim kaba kham skhem bad kham shngaiñ.
Ngi shu kyrmen, wat lada kata ka don tang khyndiat eh, ba ka sorkar bad ka NHIDCL kin ïakynduh mardor ban ïakren ïa ki sienjam ba ki dei ban shim na ka bynta ban kham pynsuk khyndiat ïa ki nongleit nongwan sha katei ka thaiñ. Ngim tharai ba u MLA ka thaiñ uba dei ruh u Symbud Myntri Rangbah, u Bah Prestone Tynsong, un sngewtynnad ban shu peitkai ïa ki jingeh ba ki paid ka Riwar Mihngi ki mad namar ka jingbymlah ban shna pynbha ïa ka surok. Kum u nongmihkhmat uba don jingkitkhlieh u dei ban tan ïa ki heh ka NHIDCL sha ka jingïakren bad ban buh ruh da ki jingkylli kiba tyngeh bad ha kajuh ka por, ban ïoh ïa ki jubab kiba biang.
