New Delhi, Kyllalyngkot:
U Myntri Rangbah jong ka Delhi u Arvind Kejriwal u la phah jubab sha ka kynhun ED da kaba u la buh jingkylli halor ki jingkhot hajir ba long pyrshah ïa u wat lada um shym la shah kynnoh donkti ha ka jingkamai bymhok na ka rukom pyntreikam ha ka tnat Excise, la ong ka seng AAP hynnin ka sngi.
U Kejriwal u la shah khot hajir ha ka kynhun Enforcement Directorate ha ka taïew ba la lah kaba la long na ka bynta ka sien kaba saw bad la hukum ba u la dei ban leit mih hakhmat ka kynhun tohkit ha ka sngi Palei. Ka seng Aam Aadmi Party ka la pynshisha da kaba ong ba ka seng BJP ka la kwah ba u Kejriwal un shahkem khnang ban khanglad ïa u ba un don bynta ha ka jingïalap ilekshon na ka bynta ka ilekshon Lok Sabha ka ban sa wan.
“Ïa kane la leh khnang ban khanglad ïa u ba un leit ïalap ilekshon na ka bynta ka ilekshon Lok Sabha. Ka kynhun ED ka la ong ba u Kejriwal um shym la shah kynnoh donkti ha ka kam klop tyngka, kata balei ba u la shah khot hajir,” la ong ka seng. Ka seng AAP ka la ong ba ki nongïalam jong ka kim shym donkti ha kane ka kam klop tyngka bad ba kin ym pynïasoh da lei lei ruh bad ka seng BJP.
