Jammu, K’lyngkot:
Uwei u shipai ka tnat Indian Army u la ïap katba uwei pat u la mynsaw na ka jingbthei u bom ba la tep shapoh khyndew ha ki bynta jong u Line of Control (LoC) ha Nowshera jong ka Rajouri distrik jong ka Jammu & Kashmir hynnin ka sngi. Kane ka jingjia ka la jia ha ka por 10:30 mynstep, ka jaka kaba jngai kumba 300 metres na Forward Defense Line (FDL) ha ka Area of Responsibility (AOR) jong ka 17th Sikh Light Battalion hapoh ka jingkhmih jong ka 80th Infantry Brigade.
Kane ka jingjia ka la jia haba ka kynhun ba la leit thwet lehnoh kaba kynthup ïa ka kynhun jong ki shipai ka tnat Indian Army ki la pynlong ïa ka jingleit thwet lehnoh ha ki bynta jong u LoC, la ïathuh ka tyllong khubor. Ka jingleit thwet lehnoh bad ka jingpahara jong ka kynhun ki shipai ha kane ka thaiñ ka long shi bynta ban buh jingshngaiñ bad ban ai ki lad jingïada ha ka thaiñ khappud. Hadien ba la jia ka jingjia, ïa kine baroh arngut ki shipai la pynkit mar mar sha ka jaka ai jingsumar kaba don ha Udhampur. Uwei napdeng kine ki shipai u la khlad noh naba la jur palat ki jingmynsaw katba uwei pat u dang shah sumar.
