New Delhi, K’lyngkot:
U Myntri Rangbah jong ka Punjab u Bhagwant Mann hynnin ka sngi u la ong ba ka seng AAP kan sa jop ha baroh 13 tylli ki Lok Sabha konstitwensi ha ka jylla.
Kane ka jingkren jong u ka la long ha ka por ba ki heh nongïalam jong ar tylli ki seng ki la pynlong ïa ka jingïakren na ka bynta ban ai ïa ka rai kaba khatduh ha kaba ïadei bad ka jingïasam ïa ki konstitwensi ha Punjab bad Delhi.
“Kan sa long 13-0 (ha ka jingïakhun ïa ka ilekshon Lok Sabha 2024). Ka seng AAP kan sa jop ha baroh 13 tylli ki Lok Sabha konstitwensi ha Punjab,” la ong u Mann.
Ha u snem ba la lah, ka kynhun ha Delhi bad Punjab jong ka Congress bad AAP ki la pynpaw ba kim don mon ban ïatreilang ha ka kynhun synrop ban ïakhun pyrshah ïa ka seng BJP.
Ki nongïalam jong baroh ar tylli ki seng ki la ong ba kin sa ïakhun la kajong ha ka ilekshon.
Ha kaba ïadei bad kane, ha une u snem, 2024, ki dkhot jong ka kynhun synrop INDIA ki la pynthymmai ïa ki jingtrei shitom jong ki ban poi ha ka thong jong ka jingïamynjurlang.
Ha ka taïew ba la lah, u Myntri Rangbah jong ka Delhi u Arvind Kejriwal u la ïakren bad u President jong ka seng Congress u Mallikarjun Kharge.
Ha kaba ïadei bad kane ka bynta, ka seng AAP bad ka seng Congress ha ka lah sngi U Blei ki la mynjur ban ïakhunlang ha ka Mayoral Post ka ban long mynta ka sngi ha Chandigarh.
U kyrtong jong ka seng AAP u Kuldeep Kumar Tita u la ïakhun ha ka ilekshon na ka bynta ka Mayor, katba na ka seng Congress u Gurpreet Singh Gabi bad ka Nirmala Devi kin ïakhun na ka bynta ka Post Senior Deputy Mayor bad Deputy Mayor.
