Davos, K’lyngkot:
Katkum ki khubor, la ong ba u heh ka Iran ha ka Sngi Balang u la ong ba ki shipai ka Iran kim shym la ther bom sha ki jaka ba shong ki riew paidbah hapoh Pakistan, hynrei ki ther sha ka jaka ba don ki lehnoh Pakistan. Kane ka long hadien ba ka Pakistan ka la pynbna ba ka jingther bom jong ka Iran sha Pakistan ka la shim ia ka jingim jong 2 ngut ki khyllung hapoh katei ka ri.
Kumta, utei u Myntri kam bar ri ka Iran- u Hossein Amir- Abdollahian ha katei ka sngi u la pynksan ha la ka jong ka nia da kaba ong ba katei ka jingther ‘namding jong ka Iran ha katei ka sngi kam shym la dei ne ktah ia kino-kino ruh ki paidbah nongshong shnong ka Pakistan kiba long hi kum la ki jong ki doh-ki snam bad ki paralok ba jan eh jong ka Iran. U Abdollahian u la kren ia kane hapoh ka jingialang World Economic Forum kaba la pynlong hapoh ka nongbah Davos jong ka Switzerland ha katei ka sngi.
Shuh shuh ruh u la pynshai bad ong ba ka jingther bom jong ka Iran ha katei ka sngi ka long pyrshah ia ka kynhun lehnoh kaba don ha Pakistan ba la ju tip kum ka Jaish al-Adl bad kaba long hi ka kynhun lehnoh jong ka Iran.
Katei ka jingther bom jong ka Iran sha Pakistan ka long ha ka miet Sngi Ba-ar hadien ba ka Iran ka la ther bom wat sha Iraq bad Syria ruh bad kiba ka la pynbna ba ka jingthmu jong katei ka kam ka long ban thombor ia kitei ki kynhun lehnoh na Iran kiba don ha kitei ki ri ba marjan.
Namar kane ka jingjia, ka Pakistan ka la pynrem jur halor katei ka jingleh jong ka Iran bad kumta ruh ka la khot noh ia u nongrah ktien jongka na Iran bad ha kajuh ka por ruh ka la khang noh ia u nongrah ktien jong ka Iran ban leit rung sha Pakistan katba ki kam ki jam baroh kim pat iaid beit- iaid ryntih kumba ka ju dei ban long.
Tang khyndiat kynta hashwa jong katei ka jingshah ther bom, u Myntri Rangbahduh ka Pakistan- u Anwar-ul-Haq Kakar u dang shu dep wan iakynduh ia u Amir-Abdollahian haba iadei bad katei ka jingialang kaba dei ban long ha katei ka sngi.
Hynrei u Amir- Abdollahian u la pynksan ia ka jingleh jong ka Iran bad ong ba katei ka jingther bom jong ka Iran shapoh u pud u sam jong ka Pakistan ka long pyrshah ia ki lehnoh Jaish al-Adl namar ka jingther bom jong kitei ki lehnoh sha Islamic Republic khamtam ha ka nongbah Rask jong ka phang Southeast ka Sistan- Baluchistan.
La ong ba ka jingther bom ha ka 10 tarik jong une u Kyllalyngkot ha katei ka nongbah, ka la shim ia ka jingim jong uwei u pulit bad kane ka long ruh tang hadien kumba shi bnai ba 11 ngut ki heh pulit ka Iran ki la duh ei ia ka jingim ha kiba kum kitei hi ki jingjia thombor.
Baroh 2 tylli kitei ki jingjia thombor ki dei kiba la kam trai bad shim jingkit khlieh da ka kynhun Jaish al-Adl (Army of Justice), kaba long ka kynhun lehnoh Sunni Muslim kaba la seng ha u snem 2012 bad kaba la shah ñiew ‘lehnoh’ bad shah khang ha ka Iran naduh kitei ki snem ba la leit.
Hynrei la ong ba kitei ki lehnoh ki la ioh phet bad ioh rieh tngen sha ki katto katne ki bynta jong ka nongbah Balochistan jong ka Pakistan, la iathuh u Amir- Abdollahian ha katei ka jingiakren bad u la iathuh ruh ba u la dep ban iakren bad ki heh jong ka Pakistan na ka por sha ka por haba iadei bad kane ka bynta.
Namar u la ong ruh ba ka Iran ka burom bad ka ñiewkor ia ki kyndon bad ki aiñ jong kiwei pat ki ri ba marjan bad kumta ruh ka Iran kam shym don jingthmu eiei ban thombor ne pynmynsaw ia ki riew paidbah ka Pakistan naba ka la ñiew ia ki kum la ki jong hi ki paidbah bad ki paralok jong ka Iran.
