Tura, K’Lyngkot 18
Ka kynhun ki ‘thei bad ki ‘rang ïalehkai ka Ri Bhoi District ki la jam sha ka final ha ka jingïalehkai phutbol Under-18 jong ka 5th Meghalaya Games 2024 bad ka jingïakhun final kan long ha ka Sngi Thohdieng ha ka PA Sangma Stadium, Tura.
Ha ka jingïakhun semi final ki kynthei kaba la long ha PA Sangma Stadium, Tura, ka Ri-Bhoi District ka la pynliem noh ïa ka Eastern West Khasi Hills District da 5-1, katba ka East Khasi Hills ka la lah ban pynliem noh da 5-0 kol ïa ka South West Khasi Hills.
Haba phai sha ka jingïakhun jong ki shynrang, ka Ri Bhoi District ka la pynliem noh ïa ka East Khasi Hills da 2-1 kol bad ka West Jaiñtia Hills ka la jop da 2-0 kol ïa ka West Garo Hills.
Kumta ka jingïakhun ïa ka kyrdan kaba lai (Third Place) jong ki kynthei kan long hapdeng ka Eastern West Khasi Hills pyrshah ïa ka South West Khasi Hills ha ka por 12:30 mynsngi bad ha ka 2:30 nohphai sngi ka jingïakhun kan long hapdeng ki ‘rang ka East Khasi Hills pyrshah ïa ka West Garo Hills.
Katba ka final jong kane ka jingïakhun kan long ha ka por 5 baje janmiet ha kaba ki ‘thei ka Ri Bhoi kin aireng pyrshah ïa ka East khasi Hills bad ha ka por 7 baje janmiet ki rang ka Ri Bhoi District kin ïa aireng pyrshah ïa ki West Jaiñtia Hills.
