Tura, K’Lyngkot 18
Ka jingpynlong ïa ka 5th Meghalaya Games kaba dang-ïaid ha nongbah Tura, West Garo Hills ka la wan mih paw ki lai tylli ki jingïalehkai tynrai (traditional games) kiba kynthup ïa ka Mawpoiñ jong ki Khasi, ka Rah-Moo-Khrah jong ki Jaiñtia bad ka Wa’pong Sika jong ki Garo.
Kine ki jingïalehkai ki la long kiba shongshit bha lyngba ka jingïashim na bynta shitrhem na baroh ki district jong ka Jylla.
Ha ki jingïakhun final jong ka Wa’pong Sika kiba la pynlong ha Don Bosco School, Tura ha ka sngi Palei, u Pangrak R. Marak ka West Garo Hills District u la long u lahduh, ïa ka kyrdan ba-ar la khur da u Lambai Challam na ka West Jaiñtia Hills District bad ba wan balai la ïoh da u Wanlamrhamiki Passah na ka West Jaiñtia Hills District.
Ha ka jingïakhun final jong ka Mawpoiñ jong ki kynthei, ka kynhun ïalehkai ka East Khasi Hills District ka la lah ban pynliem noh ïa ka West Garo Hills District. Katba ka kynhun ba wan balai dei ka West Jaiñtia Hills District.
Katba ha ka jingïakhun jong ki shynrang pat ka kynhun ïalehkai jong ka East Khasi Hills District ka la lah ban pynliem noh ïa ka West Garo Hills District ha ka jingïakhun kaba itynnad bad kaba iakhaid bha.
Ha ka ïakop Rah-Moo-Khrah kaba para marwei ki shynrang, u Da O-O Hi Dhar ka West Jaiñtia Hills District u la long u lahduh, ha kaba la bud sa u Me-U-Ru Suna na ka West Jaiñtia Hills District bad u Vincent Bareh na ka East Khasi Hills District u la wan ha ka kyrdan balai.
Katba ha ka ïakop ïalehkai kynhun (team) ka kynhun ïalehkai jong ka West Jaiñtia Hills District ba la lamkhmat da u Baphin Nongrum, Shanlangki Lyngdoh, Callten Sari, Me-U-Ru Suna bad u Da OO Hi Dhar ki la long ki nongjop hadien ba ki la lah ban pynliem noh ïa ka kynhun ïalehkai jong ka East Khasi Hills District ba la mihkhmat da u Janaising Marbaniang, Arkystar Kharkamni, Riangpor Kharkongor, Vincent Bareii bad u Arjun Thabah.
