Tura, K’Lyngkot 18
Ka kynhun jong ka West Jaiñtia Hills ka la ïoh ban khur ïa ka nam lahduh ha ka jingïalehkai Athletics jong ka 5th Meghalaya Games kaba la long ha Tura, West Garo Hills District.
Kane ka district ka la ïoh ban khur 17 tylli ki takma ba kynthup ïa 8 tylli ki takma ksiar, 4 tylli ki takma rupa bad 5 tylli ki takma rnong. Ïa ka kyrdan ba-ar la khur da ka Ri-Bhoi District hadien ba ka la ïoh ban khur 15 tylli ki takma ba kynthup 6 tylli ki takma ksiar, 6 tylli ki takma rupa bad 3 tylli ki takma rnong. Ka kynhun ïalehkai jong ka East Khasi ka la wan ha ka kyrdan balai hadien ba ka la ïoh ban khur 10 tylli ki takma ba kynthup 5 ki takma ksiar, 3 tylli ki takma rupa bad 2 tylli ki takma rnong.
Haba phai sha ar ngut ki rangïalehkai athletics kiba la ïoh ban khur ïa ka nam kum ki nongïalehkai ba kynsai (best athlete), ki long u Skhemlang Suba na Ri Bhoi District bad ka Glorify Kurbah ka East Khasi Hills.
U Skhemlang u la ïoh rah ïa kane ka nam ïalehkai ba kynsai ha kane ka lympung hadien ba u la lah ban pyndep kham sted ïa ka thong ha ka jingïakob mareh kaba 800m da kaba u la lah ban pyndep ïa ka thong ha ka por 1:54.7 sekhon kaba la biang pura ba un khur 897 point. Katba ka Glorify ka la ïoh khur ïa kane ka nam hadien ba ka la lah ba kan pyndep ïa ka thong ha ka jingïakob mareh kaba 800m da kaba ka la lah ba kan pyndep ïa ka thong ha ka 2:21.5 sekhon bad khur 809 point.
