New Delhi, K’lyngkot:
Ki la don kumba 18 ngut ki nongtong dohkha jong ka India kiba dei na Pamban kiba la shahkem ha ki shipai duriaw jong ka Sri Lanka halor ka jingshah pynshisha ba ki la pynkheiñ ïa ki kyndon ba ïadei bad ka International Maritime Boundary Line (IMBL) bad ka jingleit tong dohkha ha ki um kiba hap hapoh ka Sri Lanka.
Ki heh shipai jong ka Sri Lanka ki la kurup ruh ïa ar tylli ki lieng tong dohkha, ha kaba ïa kine la aiti sha ki heh ba dei khmih jong ka tnat Fisheries na ka bynta ban leh ïa kaba donkam.
Ki la don palat 90 tylli ki lieng tong dohka na Pamban kiba la mih sha duriaw ha ka sngi Ba-ar. Kumba la ïathuh ka tyllong khubor la ong ba katto katne tylli napdeng jong ki kiba la don bynta ha ka ban tong dohkha, ki la shah kurup noh ha ki shipai duriaw ha ka por mynmiet. Ki la don kumba 18 ngut ki nongtong dohkha ha ki ar tylli ki lieng tong dohkha, ha kaba kine baroh ki la shahkem ha ki shipai katei ka ti.
Kumba la ïathuh ka tyllong khubor, la ong ba ki nongtong dohkha kiba la shahkem ki la don bynta ban tong dohkha hapdeng ki um duriaw jong ka Dhanushkodi bad Talai Mannar. Kumba la ïathuh ka tyllong khubor kaba la wan na ka tnat Fisheries, la ong ba napdeng kiba la shong ha ar tylli ki lieng tong dohkha kiba la shah kurup, ki dei na ka thaiñ Pamban.
Ha ka lieng kaba nyngkong, ki nongtong dohkha kiba la shahkem ki kynthup ïa u Vijayakumar(45), Thansilal (28), Yogesh (39), Nijanson (26), Arockiyam (40), Innasi Piranes (23), Anthony Adimai(28), Andran (50), bad u Kemond (39). Bad ha ka lieng kaba ar la kynthup ïa u Pitchai (42), Justin (40), Innasi (38), Sathish (26), Lesbo (27), Stalin (38), Boomi (25), Batcha (25), bad Sween (32).
Ïa kine ki nongtong dohkha kiba la shahkem la ïalam sha Talaimannar Pier, ha kaba la aiti ïa ki sha ki heh nongkhmih jong ka Talaimannar Fisheries. Kine ki la shah rai ba kin shong patok hadien ba la hap hapoh ki jingpyntreikam jong ka ïingbishar.
