Imphal, K’lyngkot:
U nongïalam jong ka seng kaba bat ïa ka jingsynshar ka BJP bad u shipai barim u la shahkem na Moreh kaba don ha khappud jong ka Manipur ha kaba ïadei bad ka jingpynïap ïa u heh pulit u Chingtham Anand Kumar ha u snem ba la lah, la ïathuh ki pulit ha ka sngi Ba-ar.
Ïa u nongïalam jong ka seng BJP la tip kyrteng kum u Hemkholal Mate (36), uba dei u nongbat pisa jong ka seng ha Tengnoupal. U Mate u la long u heh nongïalam jong ka shnong K Moulsang bad u Finance Secretary jong ka Mate Tribe Union (MTU).
Ki pulit ki la ïathuh ba ka kynhun ba la ïatreilang bad ki shipai ka jylla ki la ïoh ban kem ïa u Mate bad u snar nongïalam ha ka kam pynïap briew, u Philip Khaikholal Khongsai, u nongtrei sorkar barim bad kumjuh ïa u President jong ka Moreh Youth Club, ha ka miet jong ka lah sngi U Blei.
U Senior Vice President jong ka seng BJP ha ka jylla u N. Nimbus Singh, u la ong ba ki dkhot jong ka seng ha ka jingïalang ba ka la dep ban pynlong hadien ka jingshahkem jong u Mate, ki la kyntait noh ïa u na ka seng.
