Taipei, K’lyngkot:
Ka tnat iada jong ka Taiwan ka la pyntip ba ha ka janmiet Sngi Balang la lap ia 18 tylli ki liengsuiñ thma ka China kiba leit swait bad iaid tawiar ia ka Taiwan bad kiba pynlong jingkilan ha kylleng ki bynta khappud jong ka Taiwan. Kane ka long ruh kum ka jingleit pynthut kaba kham jur jong ka China sha katei ka ri dew lynnong ba marwei hadien ba ka Taiwan ka la dep pynlong ia ka ilekshon.
Katba na ka liang ka China kaba la kheiñ ia ka Taiwan kum la ka jong ka bynta hynrei kaba la shu pait noh na ka China kumba ka la ju kam na ka por sha ka por, ha ki 4 snem mynshwa ruh ka la phah ia ki liengsuiñ thma bad ki jhad thma ba kin leit ban swait bad syntiat bad kumjuh ruh ban iaid kylleng sawdong jong katei ka ri dew lynnong khnang ba ki bor ba nabar lane kiwei pat ki ri kin ym nud ban leit iadei kam ne ban iajan bad ka Taiwan namar ka China ka kam ba ka Taiwan ka dei ka bynta jong ka bad ka lah hi ban pynbit- pynbiang da lade haba iadei bad katei ka dew lynnong.
Ka Taiwan ha ka Sngi Saitjaiñ jong ka taiew ba la lah, ka la jied ia u nongialam jong ka seng Democratic Progressive Party (DPP)- u Lai Ching-te kum u President ba thymmai jongka ha kane ka por. Ia utei u nongialam, ka China ka la ju kren ruh man ka por ba u long u nong ialeh pyrshah ba ratbah lane u nongshun ba khraw tam jong ka China bad lada ka Taiwan kan jied ia u kum u nongialam jongka, dei ka Taiwan hi kaba la khot hi dalade ia ka thma.
Kumta, ka tnat iada jong ka Taiwan ka la iathuh ba naduh ka por 7:50 jong katei ka jan miet Sngi Balang la iohi ia kitei ki 18 tylli ki liengsuiñ thma ka China kiba kynthup ruh ia ki liengsuiñ Su-30 kiba leit ban her kylleng sawdong jong ka thaiñ North bad ka phang pdeng jong kaTaiwan bad shaduh sha ki bynta jong ka thaiñ South jong katei ka ri dew lynnong Taiwan.
Shuh shuh ruh la ong ba napdeng jong kitei ki 18 tylli ki liengsuiñ kiba her kylleng sawdong ka Taiwan, 11 tylli lei ki la leit ban rung be-aiñ shaduh shapoh u pud- u sam jong ka Taiwan ha katei ka janmiet.
Watla ia katei ka bynta Taiwan Strait lane ka bynta khappud la ju shim kum ka jing pyniakhlad hapdeng ka China bad ka Taiwan, hynrei la ong ba kitei ki liengsuiñ jong ka China ha kane ka por, ki la leit ban rung be-aiñ khlem da salia shuh ia ki kyndon bad ki jingiakut kumba la dep pynlong naduh ki por ba la leit.
Ha kajuh ka por ruh ka Taiwan ka la phah ia la ki jong ki shipai ban leit syntiat bad peit thuh ia ka jinglong- jingman bad ka jingleh jong kitei ki liengsuiñ na China khnang ba yn nang ban pynkhreh bad ban iada ia la u jong u pud- u sam haba jia kano- kano ka jingiakynad ne ka thma ha ka por bym lah ban tip.
