Tura, K’Lyngkot 19
Ka East Khasi Hills ka la ïoh ban bat ïa ka kyrdan ba hakhlieh duh ha ka jingïalehkai Wushu jong ka 5th Meghalaya Games 2024.
Ha kaba kut jong kane ka jingïalehkai, ka kynhun jong ka East Khasi Hills ka la lah ban khur haduh 10 tylli ki takma ksiar 5 tylli ki takma rupa bad 3 tylli ki takma rnong. Ka district kaba wan ha ka kyrdan ba-ar dei ka Ri-Bhoi District kaba la lah ba kan khur 5 tylli ki takma ksiar bad 2 tylli ki takma rnong. Katba ka District kaba la wan ban bat ia ka kyrdan kaba lai dei ka North Garo Hills kaba la ïoh ban khur 2 tylli ki takma ksiar, 4 tylli ki takma rupa bad kawei ka takma rnong.
Haba phai sha ka Judo, ka East Khasi Hills District ka la lah ban khur haduh 11 tylli ki takma ba kynthup ïa 7 tylli ki takma ksiar bad 4 tylli ki takma rupa ha kaba kut noh artad jong kane ka jingialehkai kaba la long ha Tura.
Katba ka district kaba la wan ba-ar ha ka liang ka jingïoh ban khur ïa ki takma dei ka Eastern West Khasi Hills, ka district kaba dang shu pynkha thymmai ha ka Jylla, hadien ba ki nongïalehkai jong kane ka district ki la lah ban khur 2 tylli ki takma ksiar, 3 tylli ki takma rupa bad 2 tylli ki takma rnong. Ka district kaba la wan ba-lai dei ka Ri-Bhoi kaba la ïoh ban khur kawei ka takma ksiar, 2 ki takma rupa bad 3 ki takma rnong.
Haba phai sha ka jingïakop siatkhnam, ki jingïalehkai ki la jam sha ka final ha kaba ïa baroh ki jingïakhun na ka bynta ban ïaknieh ïa ka nam lahduh yn pynlong ha ka 20 tarik mynta u bnai ha Montfort Centre of Education School, Tura.
Ki kynhun kiba la jam sha ka final ha ka Indian Round (Women Team) ki long ka West Khasi Hills District bad ka East Khasi Hills District. Katba ha ka jingïalehkai kynhun jong ki shynrang ki long ka East Khasi Hills District bad ka South West Khasi Hills District.
Ha ka Mixed Team jong ka Revurve ki long ka South West Khasi Hills District bad ka West Jaiñtia Hills. Katba ha ka Indian Round (Mixed Team) ki long ka East Khasi Hills District bad ka Eastern West Khasi Hills District.
Ïa ka takma rnong ha ka Women Team (Indian Round) kaba la long hynne ka sngi, la khur da ka Ri Bhoi hadien ba ka la jop ïa ka South Garo Hills District. Ka West Jaiñtia Hills District ka la khur ïa ka takma rnong ha ka Men Team Event (Indian Round) hadien ba ka la jop ïa ka West Khasi Hills District.
Ka Ri Bhoi ka la khur ruh ïa ka takma rnong ha ka Mixed Team Event (Recurve) hadien ba ka la jop ïa ka Eastern West Khasi Hills District. Ha ka Indian Round Mixed Team, ka West Khasi Hills District ka la khur ïa ka takma rnong hadien ba ka la jop ïa ka Ri Bhoi District.
