Tura, K’Lyngkot 19
Ka 5th Meghalaya Games 2024 ka la lah ban sei shisha ïa ki ‘rang bad ki ‘thei ïakhun ha ka ïakop rahnar (weightlifting) bad ha kane ka jingïalehkai, ki nongïalehkai ki la wan poi na kylleng ki district ban ïakhun na ka bynta ban rah ïa ka nam jop.
Ka Ri Bhoi ka la sei ïa ki nongjop ha ka jingïakhun da kaba khur haduh hynriew tylli ki takma ksiar, katba ka East Khasi Hills, West Garo Hills, bad South-West Khasi Hills ki la ïoh mar kawei ka takma ksiar.
Ka Ri Bhoi ka la long ka lahduh ha ka weightlifting, da kaba khur 6 tylli ki takma ksiar ha kaba na ka liang ki shynrang ba ïakhun ha ka 73 kg, u Anasthasius Ryndongsngi, u la ïoh khur haduh 107 point bad ha ka sienjam ba ar da 112 points kaba la biang pura ïa u ban khur 219 point. U Wanbhabianglang Thabah, Laikmenlang Kharkongor bad u David Lyngdoh ki la long ki lahduh ha ka 61 kg, 55 kg bad 40 kg.
Na ka liang ki nongïalehkai ka East Khasi Hills ka la ïoh khur ïa ka takma ksiar ha ka kyrdan 81 kg lyngba u Edegar Benneth Jana, uba la khur 140 point.
Na ka West Garo Hills ha ka jingïakhun ha ka 67 kg, u Raksil N Sangma, u la khur 142 point bad khur ïa ka takma ksiar, katba na South-West Khasi Hills ka la don tang uwei uba khur ïa ka takma ksiar.
Na ka liang u uwei na ki nongialehkai rahnar barim ha ka Olympic na Australia, u Robert Kabbas uba dei ruh u nonghikai bad nongai mynsiem jong ka Meghalaya Elite Pathway Program u la ong, “Ka rukom pynïaid ïa ka Meghalaya Games kaba 5 ka long kaba paka bha. Nga ai khublei ïa ki nongïa -lehkai baroh. Ka Weightlifting ka dei ka jingïalehkai kaba biang bha khnang ban kyntiew ïa ki khynnah sha ka thong.”
