UK, K’lyngkot:
Katkum ki khubor, la ong ba ha u Nailar jong u snem 2012, ka jingim jong katei ka briew ka la kylla syndon bak la bak naduh ba ka leit jop ia ka jinglehkai khalai ‘EuroMillions Lottery’ kaba haduh $187.5 Million bad kaba la long kumba 1,551 Klur Tyngka ha ka pisa India. Watla katta, hadien kumba shiphew snem eiei, katei ka briew kaba la ithuh kum ka Gillian Bayford, ka la pynpaw ia katto katne pat ki jingsngew babe bad jingduh nong jongka ha kitei ki 10 snem kiba ka jingim jongka ka la kylla bad ka la im pahuh- pahai hynrei ka la duh noh pat ia ki baieid ba thoiñ jongka, kiba ka la kiar bad pynkut noh ia ka jingiadei badki tang namar ka jingrhah spah jongki bad ka jingdawa jongki ban shim kabu namar katei ka spah- ka phew ba ka don.
Hadien katei ka jingjop jongka ia katei ka jinglehkai khalai, katei ka briew ka la poi iaphet noh pat na la u jong u kurim kumba 15 bnai hadien kata bad ka daw ka long namar ki kynrum- kynram kiba mih na katei ka spah ba ka la ioh.
Ka Bayford ka la phla ruh ba ka la ai kumba $25 Million sha ki bahaiing- hasem jongka bad ka la ioh ban siew pynkhuid noh ia baroh ki ram- ki shah kiba ka don kat kiba ki paralok bad ki bahaiing- hasem ki ai jingkheiñ sha ka ha katei ka por.
Ka la pynlut ruh kumba $1,234,304 tang ban siew pynkhuid noh ia ka ram jong ka iing bad jong ki bahaiing- hasem, kynthup ia ki ram jong u hynmen bad u kpa jongka, kiba la kylla dap ram ha ki snem ba la leit namar ka jingbym biang ha ka kam ka jam bad ka jing pulom ka khaïi- ka pateng jongki.
Ka Bayford ka la ioh ruh ban pynthaw iing heh kaba ka la pynlut haduh $522,388 ha East Scotland naka bynta ki kmie- kpa jongka.
Watla katta ruh, la ong ba ki bahaiing- hasem jongka ki la shu dawa khlem sangeh bad ka hap ban shu theh pisa beit ha kitei ki snem ka jing jop jongka. Ka la ai ruh kumba $1.5 Million sha u hynmen jongka uba kwah ban seng da kawei pat ka kam lajong ba thymmai.
Hynrei namar katei ka jing dawa ba palat jongki, ka la pynlong ia ka ba kan sngew ngiah bad bitar bad kumta ka la poi iaphet noh bad u kurim jongka bad ka la im khlem ki bahaïing- hasem bad ka la poi phet marwei namar khamtam u kpa jongka, u ju ialeh ban ioh synshar bad pyniaid hi ia katei ka pisa kaba ka jop na katei ka jingïalehkai khalai.
