Tura, K’Lyngkot 19
U Pynskhemborlang Marngar na West Khasi Hills bad ka Olivia Dkhar na West Jaiñtia Hills ki la khur ïa ka nam ‘Cham-pion of Champion’ ha ka ïakob khun-kti (arm wrestling) jong ka 5th Meghalaya Games 2024 kaba la long ha Tura.
Ha kane ka jingïoh ban khur bun tylli ki takma, ka kynhun ki ‘rang bad ‘thei ïalehkai jong ka East Khasi Hills ki la lah ban khur haduh 10 tylli ki takma, kynthup ïa 2 tylli ki takma ksiar, 5 ki takma rupa bad 3 ki takma rnong.
Haba phai sha ka Table Tennis, ka East Khasi Hills bad ka West Garo Hills ki la pynpaw ïa ka jingïakhun kaba shyrkhei ha kane ka jingïalehkai.
Ha kane ka jingïaleh-kai, ka EKH ka la bat ïa ka kyrdan ba hakhlieh duh da kaba ka la khur 12 tylli ki takma, kynthup ia 3 tylli ki takma ksiar, 3 tylli ki takma rupa bad 6 tylli ki takma rnong.
Ka WGH ka la wan ha ka kyrdan ba-ar da kaba khur 8 tylli ki takma, kynthup ia 2 tylli ki takma ksiar, 2 tylli ki takma rupa bad 4 tylli ki takma rnong. Katba ka West Khasi Hills, Ri Bhoi bad ka South Garo Hills kim shym la lah ban khur wat tang kawei ka takma.
