Washington, K’lyngkot:
Ha kane ka khubor, la ong ba utei u briew u la phone bad pyntip sha ki bor pyniaid ha u nombar 911 ha kaba u la iathuh ba ka don ka jingkem ding hapoh ka iing White House bad ba don kiba sahkut hapoh. La iathuh ba ki tnat pynlip ding bad ‘Emergency’ ki la ioh ia katei ka phone ha ka por kumba 7 baje jong ka jan miet Sngi Nyngkong hynrei la shem pynban ba ka dei tang ka jingleh kamkai jong utei u briew.
Kumta, la ong ba ki bor pyniaid ba ki pulit ki la bitar ia ka jingleh jong utei u briew namar ka long tang ban pyn kyndit bad pyn kulmar ia ki pulit bad ki bor pyniaid lada kum kata kan wan jia syndon hapoh jong ka iing White House ba kyrpang tam jong ka ri United States ha kaba baroh ki Myntri Sorkar ki ju shong pyrkhat kam.
Kumta, ki pulit ki la pyrshang ban wad bniah nangno katei ka phone ka wan poi bad u President ka US- u Joe Biden u dang don ha Camp David hapoh Maryland ha ka por ba ki pulit ki ioh ia katei ka phone ha katei ka jan miet.
La ong ba kam ju kham don shuh kum kine ki jingjia watla ha ki por ba la leit, ki la don teng kum kine ha kaba ki heh naduh ki nongïasaid aiñ, ki nongbishar bad ki nongthaw aiñ ruh ki ju ioh ia kum kitei ki jait phone kiba shukor bad kiba shu pynlong kamkai.
Ha ki snem 2016 bad 2017, kumba 2,000 tylli ki phone thok la ioh pdiang da ki tnat bapher jong ki nong Jiw kiba don ha United States halor ka jingdon ki jingjia kum ki jingshah byrngem pynbthei bom, ha kaba ka la mih ka jing pyrshah ba dei namar ka jing bym lah ban synshar bad tehlakam jong u President ha katei ka por u Donald Trump.
Kumjuh ruh ha u snem 2018, uwei u khynnah ba dang hapoh 18 snem ka rta, u la shah kem bad shah pynngat kyndon ha ka sorkar US. Hynrei haba la tohkit bniah, utei u khynnah u la phla ba u leh ia katei ka kam tang kum ka jinglehkai bad ki don ki nongphah kiba thong da ka pisa ia u ba un leh ia katei ka kam, ha kaba u la ioh nong ruh haduh $240,000 ha ki Bitcoin kiba la pynpoi sha u ynda u la dep leh ia kaba la bthah.
