Pune, K’lyngkot:
Ka Crime Branch of Pune City Police ka la ïathuh hapoh ka ïingbishar ba na ka jingtohkit jong ki la tip ba ki la don arngut ki snar nongpynïap briew kiba la pynïap ïa u Sharad Mohol ha ka jingjia kaba la jia ha ka 5 tarik, Kyllalyngkot ha kaba ki la shahkem bad kine ki kynthup ïa uwei uba la tip kyrteng kum u Vitthal Mahadev Shelar (36) – kine ki dang shah tohkit ha ka kynhun pulit.
U Sunil Tambe, uba long u Assistant Commissioner of Police (Crime Branch), u la ïalam ïa u Shelar bad ïa u Ramdas Nanasaheb Marne (36) hakhmat ka Judicial Magistrate (First Class) AC Birajdar ha kaba kine ki la shah set bad shah tohkit bniah.
U Tambe u la ong ha ka ïingbishar ba u Shelar bad uwei pat uba dang phet rieh na ka kti jong ki pulit uba la donkti ha kane ka kam pynïap briew u la pynlong ka jingïakynduh bad u Munna Polekar bad uwei pat uba la shah kynnoh donkti uba la shahkem ban ïakren bad ïasuhbuit halor kane ka kam sniew.
“Hashwa kane, ngi la kem ïa ki briew kiba la donkti ha kane ka kam. Mynta ngi la ïohkem ïa arngut ki briew kiba la don bynta ha ka jingïasuhbuit sniew.
Ki pulit jong ka Navi Mumbai ki la ïoh kem ïa une u snar nongïalam lem bad san ngut kiwei pat ha kaba ïadei bad ka jingdonkti ban pynïap ïa uwei u Mohol ha ka por ba u dang shah tohkit ha ka Pune Crime Branch, la ïathuh u heh pulit.
Kum shi bynta ban leh ei ei ha kaba ïadei bad kane ka jingïoh jingtip halor ka jingjia, ka kynhun Panvel City Police ha ka janmiet jong ka Sngi U Blei jong ka taïew ba la lah ki la ïoh kem ïa ki katto katne ngut ki briew kiba la shah kynnoh donkti pynïap briew na surok bah Panvel bad kiwei pat nabar jong ka jaka ïaleh sngewbha kaba don ha Vashi ha Navi Mumbai, u la ong, ha kaba u la bynrap shuh shuh da kaba ong ba ïa kine ki 6 ngut kiba la shahkem la aiti sha ka Pune Crime Branch.
Ka jingdon jong ki briew kiba la shahkem ha kaba ïadei bad kane ka jingjia haduh mynta ka la kiew sha ki 14 ngut.
Ki pulit jong ka Pune ki la kem ïa 8 ngut ki briew, kynthup ïa u snar nongïalam ha kane ka jingjia, u Sahil Polekar (20) bad arngut ki nongïasaid aiñ, na ka jaka ba don ka surok bah Pune-Satara ha ryngkat ki tiar siat bad ki kuli bym pat pyndonkam.
“Kine ki briew kiba la shahkem ha ki pulit jong ka Navi Mumbai ki kynthup ïa u snar nongïalam ba la don kti ha ka jingjia u Ramdas Marne ba la ngeit ba une u la donkti ha ki kam ïasuhbuit bad u nongleh ïa ka kam sniew ban pynïap ïa u Mohol,” la ong u heh pulit.
Kumba la ïathuh ki pulit, la ong ba u Mohol u la don ki mukotduma kiba long pyrshah ïa u halor ki kam rahbor, ki jingthmu pynïap briew bad ki kam pynïap briew, une u la shah siat ha ki lai ngut ki briew hajan ka ïingsah jong u kaba don ha Sutardara ha ka thaiñ Kothrud ha ka 5 tarik, Kyllalyngkot.
U la ïap kham hadien ha ka jaka ai jingsumar hadien ka jingdei kuli na ki bynta ka shadem bad ka tyrpeng.
“Napdeng ki arngut, u Shelar u la long uwei na ki snar nongïalam. U dang don sa uwei pat u snar nongïalam ha kaba une u dang phet rieh na kti jong ki pulit,” la ong u Tambe ha ka ïingbishar uba la pan jingbit ban set shuh ïa kine kiba la shahkem bad ban ïohtohkit shuh shuh ïa ki sa na ka bynta ki 7 sngi.
