Germany, K’lyngkot:
Ka Germany ha kane ka sien ka la pynpaw ia ka jingbym sngew shngaiñ halor ki jingleh jong ka Russia bad ong ruh ba ka long ba la pynkhreh ia ka thma namar ka Thma Bah kaba Lai (3rd World War) ka lah ban sdang na ka Russia. Kine ki long katkum ki jingtip ba la ioh lum da ka tnat iada jong ka Germany.
Katkum katei ka kaiphod la shem ba ka Russia ka lah ban pynheh bad pyn pur ia ka thma Ukraine da kaba ktah kti bad leit pynthud sa ia kiwei pat ki ri jong ka NATO ha une us nem u ban wan bad dei kane ka ban pynsdang ia ka Thma Bah ba Lai ha utei u snem u ban wan lada ym lah ban tehlakam bad pynsangeh noh ia baroh ki thma bad ki jingiakynad jong ki ri bapher kumba la iohi ha kane ka por.
Kumta la ioh jingtip ruh ba ki shipai ka Dewbah Europe ki la pynkhreh ia ka thma kaba lah ban sdang da ka Russia pyrshah ia ki ri ka Nato kiba don sha ka thaiñ East.
Namar la ong ruh ba ka jingnoh synñiah jong ki ri na ka thaiñ West ka la sdang duna, kumba ki shipai ka Russia kin sa sdang ban hiar thma biang puk ha kaba sdang ka aïom Tlang.
Ha katei ka kaiphod ba la ioh lum da ka Germany, la batai bad kdew ruh thik pa thik da ki bnai bad ki por ba ka Russia ka thmu ban leit hiar thma sa ia kiwei pat ki ri jong ka NATO bad ha kano ruh ka dur ka NATO kan iada ia kitei ki ri kiba don hapoh jongka.
