Shillong, K’Lyngkot 21
Ka Meghalaya ka la lah ban pynliem noh ïa ka Nagaland da shi pali (innings) bad 128 run tang ha ka sngi ka ba-ar jong ka jingïalehkai Ranji Trophy Plate Group kaba la long ha ka sngi Saitjaiñ ha MCA Ground, Shillong.
Haba phai sha ka jingïakhun, ka Nagaland ha ka pali kaba nyngkong (first innings) ka la lah ban tied tang 72 run bad hap lut baroh ki wiket ha ka sngi sdang bad ka Meghalaya ka la kamai 196 run bad hap 7 wiket. Haba ka la bteng biang ban tied ha ka sngi ba-ar, ka la ïoh sa 108 run ha kaba u Jaskirat Singh Sachdeva u la tied marwei 75 run bad u Akash u la tied 20 run.
Kumta ka Meghalaya hadien ba ka la kamai haduh 304 run, ka la lah ban tam lypa ïa ka Nagaland da 232 run.
Ka Nagaland kaba la hiar madan biang ban bteng ïa ka pali kaba ar (second innings) ka la lah ban kamai tang 104 run bad hap lut baroh ki wiket, kaba la pynlong syndon ïa ka Meghalaya ban nym donkam tied biang hynrei ban jop da shi pali bad 128 run.
Kane ka jinglah jong ka Meghalaya ban khur ka jingjop kaba suk, ka la wan lyngba ka jinglah ban ïaleh -kai bha jong u nongka-wang bol jong ka, u Akash Kumar Choudhury uba la khur marwei haduh 10 tylli ki wiket, kata 7 tylli ha ka pali ba nyngkong bad 3 tylli ha ka pali ba-ar bad kumjuh ruh u Ram Gurung uba la khur haduh 6 wiket bad ai tang 15 run ha ka pali ba-ar.
U Akash Kumar Choudhury uba la khur 10 wiket na kane ka jingïalehkai, u la ïoh khur ruh ïa ka khusnam ‘Player of the Match’.
Hadien kane ka jingjop, mynta pat ka Meghalaya kan sdang ban pynkhreh ban ïakhun pyrshah sa ïa ka Mizoram ha kane ka lympung ka ban sdang naduh ka 26 tarik u Kyllalyngkot ha Anand, Gujarat.
