Beijing, K’lyngkot:
Ka China ha kane ka por ka la pyntip ba ka ioh-ka kot ka la hiar bha ban ianujor bad ka jinglong jingman ha ki phew snem ba la leit.
La ong ba ka ioh ka kot jong ka China ka la shim por bha ban kiew bad kam lah shuh ban kiew stet kumba long ha ki snem ba la leit.
Kumta, la ong ba katkum ka jingpeit thuh jong ka National Bureau of Statistics, la shem ba ka Gross Domestic Product ha China ka la kiew da 5.2% bad ka la poi 126 Trillion Yuan lane kumba $17.6 Trillion ha u snem ba la leit.
Watla katta, la ong ba kane ka dang kham biang lada ianujor pat bad ka jinglong- jingman bad ka jinghiar ka ioh-ka kot bad ka khaïi-pateng ha China ha ki snem ba la leit haduh 2022 naduh ba ka khlam Covid ka la wan pynjot bad pyn-um lut ia ka ioh- ka kot bad ka khaïi- pateng hapoh ka ri.
Tang mar ia weng hi ia ki kyndon pyrkhing jong ka khlam Covid ha u snem 2022, ka China ka la ialeh katba lah ban kyntiew ia ka ioh- ka kot jongka da kumba 5% na u snem ba la lah.
Kumta, la ong ba ka China sa shisien pat ka la lah ban khyllie khlieh biang nadien ka jingshah lynshop jur ha ka khlam Covid-19 hynrei ban ianujor pat bad ka jinglong- jingman ha ki snem shuwa ban wan ka khlam, ka China kam shym la lah shuh ban long biang kumba ka ju long ha kitei ki snem shuwa ban wan ka khlam Covid bad kane ka la ktah jur bha ia ka ioh- ka kot jong ka China ha kane ka por.
Kawei na ki daw kaba pynhiar ia ka ioh- ka kot jong ka China ka long hadien ba mih ki kynrum- kynram bad ki jingiakynad bad ka United States bad ha kajuh ka por ruh ka jing pyrshang jong kiwei pat ki ri kiba ju shaniah ha ka China, ba kin ïeng hi noh ha la ki jong ki kjat lane ba kin wad lad noh sha kiwei pat ki ri kiba kham bit bad kham biang ban ia ka China.
