Washington, K’lyngkot:
Ki heh ka tnat iada jong ka US ha ka Sngi Thohdieng ki la iathuh ba kawei ka drone jong ka United States ka la leit hap bakla sha ka phang North jong ka Baghdad hapoh Iraq ha katei ka sngi bad kane ka long ruh hadien ba ki lehnoh Iraq ki la pynbna ba ki la ioh ban siat pynbthei bad pynhap ia ka drone kaba leit poi sha Iran ha katei hi ka sngi.
Namar la ong ba kitei ki lehnoh na Iran ha ka miet Sngi Palei ki la ioh siat pynhap ia kawei ka UAV jong ka US kaba leit poi sha ka thaiñ Balad jong ka Iraq ha katei ka miet.
Ha ka stei ba bud ki bor pahara ka Iraq ki la lap ia katei ka drone bad la ong ba ym shym la don kiba ngat ne mynsaw ha ka jinghap bad jingbthei jong katei ka drone ha katei ka jaka.
Namar la ong ba ka Islamic Resistance na Iraq, kaba don jingiadei bad ki lehnoh na Iran bad kaba pyrshah jur ia ka jingleit ai jingkyrshan jong ka US ia ka Israel hapdeng ka jingleit hiar thma jong ka Israel sha Gaza Strip, ha ka Sngi Thohdieng ka la pyntip ba ka la ioh ban siat pynhap ia ka drone MQ-9 jong ka US, kaba long ruh ka drone kaba lah ban pyndonkam ha ka ban leit syntiat bad kumjuh ruh kaba lah ban leit thombor da katei hi kajuh ka jait drone. La ong ruh ba ia katei ka drone la iohi naduh ka Sngi Balang kaba la leit her kylleng sawdong jong ka Iraq.
Kumba la iohi ba ki shipai US bad ki shipai jong kiwei ruh ki ri kiba don jingiadei bad ka US bad kiba don hapoh Iraq bad Syria, ki la shah thombor ha kumba 140 tylli ki jingjia thombor naduh u bnai Risaw ba jia ka thma hapdeng ki lehnoh Hamas bad ka Israel bad kiba bun na kitei ki jingthombor ki dei kiba la kam trai bad shim jingkit khlieh da ka kynhun lehnoh Islamic Resistance jong ka Iraq bad kumta na ka liang jong ka United States ruh ka ju leit ban thombor bad pynhiar kput ia kitei ki ri baroh 2 kynthup ia ka Iraq bad Iran namar katei ka jingleh jong ki lehnoh na kitei ki 2 tylli ki ri.
