Tura, K’Lyngkot 21
Ka lympung ïalehkai ba la tip kum ka Meghalaya Games 2024 ïa kaba la pynlong ha nongbah Tura jong ka West Garo Hills, la pynhap pyrda noh ha ka Sngi Saitjaiñ hapdeng ka iphuh-iphieng.
Ha kane ka sngi, shwa ban pynhap pyrda, u Myntri ka tnat Kam Ïalehkai ka jylla u Bah Shakliar Warjri, uba la hiar ban jurip ha kylleng ki jaka ba la pynlong jingïalehkai bad ban leit ban ïakren hi markhmat bad ki khynnah ïalehkai kiba wan na kylleng ka district jong ka jylla ban lap bad kylli ïa ka jingduna baroh khamtam ha kaba ïadei bad ka bam kumba la saphriang ha ki rynsan social media ha kine ki khyndiat sngi ba la leit.
Haba ïakren bad u Bah Shakliar Warjri halor ka jinglap ka jong u, ha kane ka jingleit ïakynduh mar-khmat ïa ki khynnah, u la ong, “Na ka liang ka tnat ngi la pynthikna ban ai ïa kaba bha tam na baroh sha ki nongïalehkai baroh hynrei nga kubur pat ba ha ka sngi jong ka jingsdang ïa ka lympung Meghalaya Games ba ka la don ka jingduna ïa kaba ngm lah ban len ba ki khynnah kin ïoh bamja sngi da la kut ka por.
U Myntri u la ong, “Ngi la ïaleh katba lah ban pynbiang lut nadong shadong hynrei ngim shym la poi pyrkhat ba kin mih kum kine ki jingduna ha ka sngi sdang. Ngam kwah ban kynnoh ne kynthoh ïano ïano ruh bad nga shim ha ka jingkitkhlieh ha lade bad nga pan map na ki nongïalehkai bad ruh ki kmie ki kpa ba kin nym sngeweiei halor kine.”
U Bah Shakliar u la ong, “Ha ka sngi sdang, ïa kaba la wan ban plie da ka President ka Ri ïa kane ka lympung, kumta na ka liang ki bor pynïaid District ki la khang lut ïa ki lynti ïaid baroh bad dei kane ka daw ba khlem lah ban pynpoi ïa ka bam ha ka por ba biang, hynrei ha ka sngi kaba bud pat, nga da lade nga la leit ban jurip bad ban bthah sha baroh ki nongpynïaid ban pynthikna ba kan nym dei ban jia shuh kumjuh.”
U la ong ba ka lympung Meghalaya Games ka dei ka shlem ban saiñdur bad pynmih ïa ki ‘rang bad ‘thei ïalehkai jong ka jylla bad kum u Myntri ba khmih ïa kane ka tnat, un nym shongthait bad mar ïadep kane ka Meghalaya Games un lum ïa ka jing-ïalang ba kumno pat kin pyrkhat sa ïa kiwei pat ki lad ki lynti kumno ban kyntiew ïa ki jingdonkam bad ruh ïa ki khynnah ïalehkai.
Haba la ïoh lad ban ïakren pat bad ki katto katne ki nongïalehkai kiba la ïashim bynta ha kane ka lympung, ki la pynpaw ïa ka jingkmen ba watla ha ka sngi sdang ki la mad ïa ki jingduna hangne hangtai hynrei na ka liang ka tnat ïalehkai ym tang ba ka la lah ban pynbiang ïa ka bam hynrei ki da sngew -nguh ruh ïa ka jingkhuid ha ki jaka sah bad ka jinglong la kloi ki briew na Garo ban ïarap ha baroh ki liang ba ki donkam ha baroh kine ki sngi ba ki la don ha kane ka jaka.
Shuh shuh na ka liang jong ki nongïalehkai ki la ong, “Ngi la ïoh shibun ki jingmyntoi bad ki jingshemphang bad ngi da kwah ruh ba ka tnat ryngkat bad ka Sorkar Megha -laya kin dang bteng ban pynlong ïa kum kine ki lympung khnang ba ngin nanglah shuh shuh ban ïoh ki rynsan kiba paka ban pynpaw ïa la ki sap ki phong ki jong ngi.”
