Shillong, K’Lyngkot 21
Ka jingïaid lynti jong ka Shillong Lajong Football Club ha ka lympung Super Cup ka la kut noh hadien ba ka la mad ïa ka jingshah rem kaba lai bad kaba khatduh ha Bhuba-neshwar. Kane ka wan hadien ba ka la shah pynliem biang sa ha ka Jamshedpur FC da 2-0 kol.
Ha shwa jong kane, ka Shillong Lajong ka la dep ban shah rem ruh ha ka Kerala Blasters FC bad North East United FC. Kine ar tylli ki jingshah rem hakhmat ki la pynlong lypa ïa ka Shillong Lajong ba kan nym lah shuh ban jam shakhmat. Watla ka lynti ka la kut, hynrei kan jin lada long kaba kmen lada ka Shillong Lajong kan ïoh khur shi point ne 3 point na ka jingïakhun pyrshah ïa ka Jamshedpur, hynrei kam shym la long kumta.
Haba phai sha ka jingïalehkai, watla ka Shillong Lajong ka la ïakhun tyngeh hynrei ha shwa ban wai ka kylla step, ka Jamshedpur ka la ïoh thep kol lyngba u Mohammed Sanan (45’+1). Ha ka kylla miet pat tang ha ka minit kaba 52, ka Jamshedpur ka la ïoh ïa ka penalty hynrei ka la pynlehnoh ei noh hadien ba ka bol ba la shut da u Seiminlen Doungel, uba la ju ïalehkai teng na ka Shillong Lajong ha ki snem 2014-15 ha ka lympung I-League, ka la leit ban dei beit ïa u diengkol.
Katba ka jingïalehkai ka dang ïaid, ha ka minit kaba 73 ka Jamshedpur ka la ïoh ban khyrwit ïa ka kol kaba ar lyngba u Thongkhosem Haokip bad khur ïa baroh ki 3 point.
Hadien ka jingshah rem bad hap wan phai ïing noh, mynta ka Shillong Lajong kan hap ban phai khmat pat kumno ban ïalehkai bha ha ka lympung I-League, ka ban sa sdang biang naduh ka 3 tarik Rymphang bad ka jingïakhun kaba nyngkong kan long pyrshah ïa ka Inter Kashi ha la ïing.
