New Delhi, K’lyngkot:
Ka Pakistan bad Iran ha ka Sngi Thohdieng ki la mynjur ban pyn jai-jai noh ia ka jingiakynad hapdeng jongki kaba la jia ha ki bynta khappud jong ka thaiñ Baluchistan ha kine ki sngi ba la leit. Namar la ong ba ka jingiakynad bad jingïather bom ba mar kylliang jong kitei ki 2 ri ha kine ki sngi ba la leit, ka la wanrah ia ka jingma kaba khraw ba ioh kitei ki 2 ri kin poi sha ka thma kumba long ka Israel- Gaza bad ka Russia- Ukraine.
Katei ka jingjia ka la sdang naduh ba ka Iran ha ka miet Sngi Ba-ar ka la leit ther bom sha ki bynta jong katei ka nongbah Baluchistan hapoh Pakistan, ha kaba ka Iran ka la kam ba katei ka jingleit thombor jongka ka long pyrshah ia kito ki lehnoh ka Iran hi kiba la poi phet rieh sha kitei ki bynta jong ka Pakistan bad don ruh kiba la leit phet sha kiwei pat ki ri ba marjan jong ka Iran.
Haba iadei bad kane, na ka liang ka Pakistan ruh ka la ther kylliang sha ki bynta ba khappud jong ka Iran ha ka Sngi palei.
Kumta, katei ka jingiakynad jong kine ki arliang ri ka la wanrah jingma shibun khamtam ha kum kine ki sngi ba dap sa tang da ki jing pynkhreh thma kat shaba phai bad kumta ki ri na kylleng ka pyrthei ki la shu pynkhreh ioh ki ri ba marjan jongki kin leit thombor ne hiar thma ia ki kumba la sdang nyngkong eh da ka Russia pyrshah ia ka Ukraine.
