Srinagar, K’lyngkot:
Ha kaba ïadei bad ka jingmih shibun ki jingeh ha ki ar tylli ki distrik kiba don ha ka bynta khappud kata ka Poonch bad Rajouri na ki kam pyntriem jong ki lehnoh ha kine ki khyndiat snem ba la leit, ki shipai ki la rai ban pynlong noh da ka jingleit thwet kaba jur pyrshah ïa ki lehnoh ba la tip kum ka ‘Operation Sarvashakti’ ban lah pynduh pyndam noh syndon ïa ki kam pyntriem jong ki lehnoh ha kine ar tylli ki distrik jong ka Jammu & Kashmir.
Ki shipai hapoh ka kynhun Operation Sadbhavana, ki la shimti ban khmih bniah ïa ka shnong Topi Peer ha Poonch, ha kaba ki la don kumba lai ngut ki riewpaidbah kiba la shah pynïap ha ka jingjia ba dang shen.
Ki shipai ïada ri ki la suba ba ki la don kumba 25-35 ngut ki lehnoh, ha kaba kham bun na ki ki dei ki bar ri, kiba dang pynlong ka jaka rieh tngen ha ki thaiñ ba long khlaw ha kine ki ar tylli ki distrik.
“Ïa ka jingthmu ban pynïaid shakhmat ïa kane ka jingpyntreikam la ai jingmut da ka kynhun ba kham halor ha kaba ïadei bad ka jingthmu ban pynbiang ki lad jingïada bad ki jingshngaiñ ha kine ki thaiñ ïa kaba la ïatai nia bha ha ka jingïalang ba la pynïaid da u Myntri ka sorkar kmie uba dei khmih ïa ka tnat ki kam pohïing u Amit Shah,” ki la ong.
Ïa ka jingïalang jong ka jingïaphylliew jingmut halor ki lad jingïada ha kine ki thaiñ la pynlong ha u bnai ba la lah hadien ba ka la jia ka kam thombor pyrshah ïa ki kali jong ki shipai ha ka thaiñ Dera Ki Gali (DKG) jong ka Rajouri ha kaba ki la don kumba 4 ngut ki shipai kiba la ïap bad lai ngut kiwei pat ki la mynsaw.
