Shillong, K’Lyngkot 21
Ka Umphyrnai Sports Club ka la lah ban pynliem noh ïa ka Mawkhar Sports Club ha ka lympung ïalehkai First Divi-sion 2023 ba la pynïaid da ka Shillong Sports Asso-ciation ha First Ground, Polo ha ka sngi Saitjaiñ.
Ha kane ka jingïalehkai ka Umphyrnai ka la lah ban pynliem noh ïa ka Mawkhar da 1-0 kol. ïa kane ka shi kol la ïoh ban khyrwit da u Damanglang Kharbyngar ha ka minit kaba 23 jong ka jingïalehkai.
Kane kan dei ruh ka jingjop kaba nyngkong eh jong ka Umphyrnai ha kane ka aïom ba mynta, kata hadien ba ka la shah pynliem noh ha ka jingïalehkai sdang da 1-0 kol ha ka jingïakhun pyrshah ïa ka Nongrim Hills Sports Club.
Ha kane ka jingïalehkai, watla ka Mawkhar ka la ïoh bun tylli ki kabu ksiar hynrei kam shym la lah ban pynurlong ïa kine, kiba la long ka daw jong ka jingshah rem noh. Kumba ka long mynta, ka Mawkhar ka dang khur tang 1 point hadien ba ka la ïakhaid ha ka jingïalehkai kaba nyngkong bad kumta mynta ka dang wad ban khur nam jop ba nyngkong jong ka aiom.
Ka jingïalehkai ban wan jong kane ka lympung, kan long biang ha ka 23 tarik mynta u bnai hapdeng ka Lawsohtun Sports Club pyrshah ïa ka Laitkor Sports Club ha ka por 2:15 nohphai sngi.
