Aizawl, K’lyngkot:
Ki 276 ngut ki shipai ka tnat Myanmar Army, kiba la wan poi kum ki poiwir ha Lawngtlai distrik kaba don ha Mizoram hadien ba ki jaka treikam jong ki ki la shah thombor ha ki lehnoh jong ka kynhun Arakan Army (AA), kin sa shah pynphai noh sha ka ri jong ki shen, la ïathuh ki heh shipai.
Ki heh shipai ha Aizawl ki la ong ba ki 276 ngut ki shipai Myanmar ha ryngkat ki tiar siat bad ki kuli ki la poiwir ha ka shnong Bandukbanga kaba don ha ka khappud ha lad jong ka Mizoram-Myanmar-Bangladesh ha ka bynta ba shaphang Shathie jong ka Lawngtlai distrik ha ka por shiteng sngi jong ka sngi Balang jong ka taïew ba la lah.
Kine ki shipai mynta ki don hapoh ka jingshah khmih bniah bad ka jingsumar jong ki shipai ka tnat Assam Rifles ha ka jaka treikam jong ki kaba don ha Parva ha Lawngtlai distrik.
Ki shipai ka tnat Assam Rifles ki la pahara ha ka jaka kaba jngai kumba 510 km ha Mizoram ban kerkut ïa ki bynta khappud bad ka Myanmar.
“Ïa ki jingpyntreikam kiba bniah kynthup ha kaba ïadei bad ka jinglum jingtip kaba bniah shaphang kine ki shipai Myanmar la pynïaid shakhmat. Kumjuh la ai ruh ki lad jingsumar na ka bynta jong ki. Hadien ba la ïoh ka jingpynshai na ki heh ba dei khmih jong kine ki shipai bad ka jingïakren shai ban pynbeit halor ki jingpyntreikam, yn sa phah noh kham kloi sha ka ri jong ki,” la ïathuh shuh shuh ki heh shipai jong kane ka jylla.
Da ka jingdon jong kine ki shipai Myanmar mynta kiba la poiwir sha Mizoram, naduh ka 13 tarik, Naiwieng jong u snem ba la lah, ka la kiew sha ka 636 ngut.
Ka jingpynphai biang ïa ki sha Myanmar ka la long katkum ka kynhun ha kaba ha kane ka sien kaba mynta ka jingpyntreikam ka dang bteng ban pynphai sa ïa kane ka kynhun kaba dang poiwir shen ha ka jylla.
