Agartala, K’lyngkot:
Ka sorkar Tripura ka la rai ban buh ïa saw tylli ki jaka treikam kiba thymmai jong ka Central Bureau of Investigation (CBI) bad ki la ïoh ruh ïa ka jaka na ka bynta ban buh ïa ka Central Detective Training Institute, la ïathuh u Myntri Rangbah jong ka jylla u Manik Saha.
U Saha u la ong ba ki pulit jong ka Tripura ki la trei borbah ha kaba ïadei bad ka jingpyndep ïa ki kam ram jong ki ha ka jylla.
Kine ki la trei shitom ban pyndep ïa ki kamram jong ki, ha kaba ki la ïohmad ïa ka jingjop bad ïai bteng ïa ka kam ban kynjoh sha ka 150 snem jong ka jingshakri, ha kaba ka la pynlong ïa ki ban lah ban pynduna ïa ki kam pyntriem bad ki kam beaiñ ha ka jylla.
“Ki la trei khlem shongthait miet la bad sngi, ha kaba kane ka la nang kyntiew shuh shuh ha kaba ïadei bad ka jingtreikam jong ki aiñ ki kanun bad ban pynbha ïa ka jinglong jingman hapoh ka jylla jong ngi. Ngi la don jingthmu ban lah ban treikam bad ban lah ban kot sha ka 100% ha kaba ïadei bad kane ka bynta bad ma ngi baroh ngi la donkam ban nang trei shitom shuh shuh na ka bynta ban poi sha ka thong ba la buh.
Naduh ki kam beaiñ kiba long pyrshah ïa ki kynthei, ka jingïakhun pyrshah ïa u drok, ki kam beaiñ kiba la mih na ki jaka-puta, ki jingïakynad bad kiwei pat kumba la sakhi, ki la duna shibun. Dang shen, ha kaba ïadei bad ka jingpyntreikam la lah ban pynkut noh ïa ka jingai jinghikai pyntbit ïa ki shipai ka kynhun Tripura State Rifles (TSR). Ka kynhun TSR kumba ka paw ka la lah ban trei borbah ha baroh kawei ka ri, ha kaba ar tylli ki kynhun ki la shah pyntreikam ha Delhi bad ha Chhattisgarh,” la ong u Saha.
U la ong shuh shuh ba ka jylla Tripura ka la ïoh-pdiang ïa ka jingkyrpad na ka jylla Manipur na ka bynta ban pynbiang ka jing-ai jinghikai ïa ki pulit langrut ka jylla.
