Ha kine ki sngi, ka jingdawa jong ka Voice of the People Party (VPP) ban thung kam biang ïa ki lai ngut ki ophisar ka Meghalaya Lokayukta, kiba la shah weng noh ha ka sorkar MDA-II, ka la thnem. Ngi la ïohi ba ha ka 19 tarik Kyllalyngkot, ki la don ki nongïalam ka VPP kiba la thmu ban leit tur sha Main Secretariat, hynrei la pynsangeh noh ïa ki hakhmat ka shlem treikam ka Deputy Commissioner, bad ha kane ka jingjia, ka la mih ruh ka jingshah leh jubor jong u MLA ka Mawlai, u Bah B Marbaniang, ha ki pulit kiba la khang lynti ïa u. Lada kat ïa u MLA uba la shah jied ha ki paidbah u dang shah leh ha kato ka rukom, sa ngi ki thap ki dab lei katno tam? Nalorkata, ka jingkah dur jong kito ki pulit ka pyni ba ka lah ban don eiei sha lyndet. Ym da donkam ban ïa kah dur kah dar haba wan ki ‘riew paidbah, bad dei ban pyni ïa la ka dur bad ka kyrteng. Ka jingkah dur ka pynsuba sniew pynban ïa ngi ki paidbah.
Lah ban kdew ba ka sorkar ha u bnai Nohprah ka la weng kam ïa baroh ki ophisar ka Lokayukta kiba don bynta ha ka kam tohkit. Kine ki kynthup ïa u Bah Jainal Rymmai, uba long u Director ka tnat Inquiry & Prosecution, bad ïa u Bah Rymphang Pde bad Anil K Sangma, kiba dei ki ophisar ba pynlong ïa ki jingtohkit. Ka sorkar ka la thung noh da kiwei pat ki ophisar ha ka jaka jong kitei ki lai ngut, hynrei ka VPP ka la dawa ba dei ban thung biang da kitei ki lai ngut. Kine ki ophisar kiba la shah weng ki dei kiba la dep ban shongthait shwa na ka kam pulit bad kiba la shah thung ha ka jaka jong ki, ki dei kiba dang don ha ka kam ba kynthup ïa uwei u heh IAS bad arngut ki pulit MPS. Ngi dei ban tip ba ka Lokayukta ka lah ban tohkit lada don ki jingujor bamsap pyrshah ïa u heh sorkar naduh u Myntri Rangbah, Symbud Myntri Rangbah, Myntri bad kiwei-kiwei. Ban tohkit ïa kita, hap ban don da ki ophisar ha ka tnat Inquiry & Prosecution jong ka Lokayukta.
Na ka liang u Symbud Myntri Rangbah ka jylla u Bah Prestone Tynsong u la kren shai ba ka sorkar kan ym thung kam biang ïa ki lai ngut ki ophisar kiba ka la dep ban weng kam na ka Lokayukta. U la ong ba ka sorkar ka hap ban ïaid katkum ki kyndon jong ka aiñ Lokayukta bad kumba ka long mynta, ka Lokayukta ka la treikam pura bad ki kam ruh baroh ki la dap. U la ong ba ki kyndon ka Lokayukta ruh ki la kren shai ba ki ophisar ba shah thung kum ki dkhot ki dei ban long kiba dang don ha ka kam, ym kiba la shongthait. U la kynthoh ruh ba na ka jingïakhih jong ka VPP ka paw ba kito ki ophisar kiba la shah weng kam ki don jingïadei bad ka VPP.
Kaba pynsuba sniew ïa kiba bun ka long ba ka jingweng ïa kitei ki lai ngut ka long hadien ba ki la lap ïa ki kam bamsap bamngem ha Garo Hills Autonomous District Council (GHADC), bad bun ngut, kynthup ïa u Sanjay A Sangma, MLA ka NPP na Mahendraganj uba dei ruh u kynum trai jong u Myntri Rangbah, Conrad K Sangma. Hynrei ka sorkar ka la kyntait war ïa kane ka jingsuba sniew bad ka la kdew ba kata ka aiñ Lokayukta ka kren beit ban thung ïa ki ophisar kiba dang trei ha ka kam bad ym kiba la shongthait. Tangba kiba bun kim sngewhun ïa kane ka jingai daw jong ka sorkar bad ki ngeit beit ba ka dei ka jingleh khnang hadien ba la lap ïa ka bamsap bamngem ha GHADC.
Ngi la sngewthuh ba ka VPP kan ym shongthait na kane ka jingdawa ban thung biang ïa baroh lai ngut ki ophisar kiba la shah weng bad na ka liang ka sorkar ruh kan ïai pyneh beit bad kan ym thung kam biang ïa ki. Shaei yn ïa poi haba kumta? Lehse kaba lah ban ai rai khatduh ka dei ka ïingbishar. Ïa mynta, ka sorkar kan ym pyndem ha ka jingdawa jong ka VPP namar ka sngewheh mynsiem ba ka dei ka sorkar bun paid. Ngin sa hap ban nang ïa peit kaei ka ban jia ha kine ki sngi ki ban wan namar ngi ïohi ba kane kan ym pat kut tang ha ka jingïapyni nia hapdeng ka VPP bad ka sorkar.
