New Delhi, K’lyngkot:
Ïa ka dorbar mang tyngka kaba shipor jong u snem 2024 la thmu ban wanrah da ka Myntri ka tnat Pla Tyngka ka Nirmala Sitharaman ha ka 1 tarik, Rymphang, ha kaba la tyrwa ïa ka sorkar NDA hapoh ka jingïalam jong ka seng BJP ba kan ai ïa ka rai kaba khatduh ha kaba ïadei bad ka jingthmu ban nang pynkhlaiñ shuh shuh ha ka jingpyntreikam na ka bynta ka ilekshon Lok Sabha ka ban sa long kham hadien jong une u snem.
Na ka bynta kane, ka la thmu ban khmih bniah ha kaba ïadei bad ka ‘GYAN’ (Gareeb, Youth, Annadata and Nari) ka skhim ka ban ai jingmyntoi ïa ki briew kiba duk, ïa ki samla, ki nongrep bad ïa ki long-kmie.
Ha kaba ïadei bad kane, ka sorkar ka la thmu ban ïakren sani bha ha ka dorbar mang tyngka ka ban sa wan.
Naba ka ban sa long shen kan dei tang ka dorbar mang tyngka kaba lyngkot ne tang shipor, ka jingthmu jong ka sneg ka long ban khmih bniah halor ki rukom pyntreikam khnang ba ka seng kan ïoh kham bun ka jingkyrshan. Kumba la sakhi, la ong ba hashwa ka ileshon Lok Sabha ka seng BJP ka la ïaleh ban wanrah ki jingmyntoi ïa ki nongshong shnong ka ri ha kaba dang shen, kata ha ka 15 tarik, Kyllalyngkot u Myntri Rangbahduh, u Narendra Modi u la pyllait paidbah ïa ka jingsiew kaba nyngkong sha shi lak ngut ki nongïoh myntoi jong ka skhim Pradhan Mantri Awas Yojana-Gramin (PMAY-G) hapoh ka jingtreikam jong ka Pradhan Mantri Janjati Adivasi Nyaya Maha Abhiyan (PM-JANMAN) prokram, la ïathuh u heh sorkar.
Katkum ka jingphah khubor jong ka Prime Minister’s Office (PMO), la ong ba ka jingsiew kaba nyngkong la pyllait ha kane ka sngi ka 15 tarik, Kyllalyngkot.
U Myntri Rangbahduh lyngba ka dur-khih u la ïakren bad ki nongïoh myntoi jong ka PM-JANMAN ha kane ka sngi.
Kum shi bynta ban poi sha ka thong jong ka Antyodaya kumba la mut u Myntri Rangbahduh ban pynkupbor lut ïa ki briew ha kane ka jingïaid lynti, ïa ka PM-JANMAN la pyllait paidbah na ka bynta Socio-Economic Welfare of Particularly Vulnerable Tribal Groups (PVTGs) ha ka 15 tarik, Naiwieng, 2023, ha ka jingrakhe ïa ka Janjatiya Gaurav Diwas. Ka PMO ka la ong ba ka PM-JANMAN, ha ryngkat ka jingmang tyngka kumba la antad ba ka la long T. 24,000 klur, ha kaba la khmih bniah ruh ïa ki jingïakren halor ki 11 tylli ki bynta lyngba ki 9 tylli ki tnat treikam.
Ka la don jingthmu na ka bynta ban kyntiew ïa ki jinglong jingman ha ka ïoh ka kot bad ka jingbha ka imlang-sahlang jong ki PVTG da kaba pyllait ïa ki ïing na ka jingktah jong ka jingshlei um bad kumjuh ban pynbiang jaka sah ïa ki briew ha ki jaka ba shngaiñ, ba biang ka umbam-umdih bad ki jaka leit bar, ban kyntiew ha ka liang ka pule-puthi, ka koit ka khiah bad ki jingbiang ki jingbam batei, ka bording, ki surok bad ki lad phah khubor bad ban pynbiang ïa ki jingdonkam baroh kumba dei ban long.
