Bengaluru, K’lyngkot:
Kum shi bynta ban lait na ka jingpynkheiñ ïa ka Code of Conduct na ka bynta ka ilekshon Lok Sabha ka ban sa long ha basdang u bnai Lber, u Myntri Rangbah jong ka jylla Karnataka u Siddaramaiah u la ong ba ïa ka dorbar mang tyngka yn sa pynlong noh ha u bnai Rymphang.
Kane ka jingpynbna kaba la long ha Haveri ka la long haba ka sorkar ka la sdang ban ïakren halor ka jingthmu ban pynlong ïa ka dorbar mang tyngka bad ki tnat treikam jong ka sorkar bad kiwei pat ki kynhun. U la ong ba ka sorkar ka la sdang ban phah T. 2,000 na ka bynta ka 1 hectare ka jingïarap sha ki Bank Account jong ki nongrep kiba la shah ktah jur na ka jingrang tyrkhong. Wei ba ka sorkar jylla kan ïoh jingïarap na ka sorkar kmie, ka jingai ïa ka bailutksan kan sa long sha ki nongrep katkum ki kyndon ba la buh ha ka NDRF, u la bynrap.
