Shillong, K’Lyngkot 22
Ka Shillong Soccer Scout, Rangdajied United FC, Lah Bet SC bad ka Umphyrnai SC ki la khur ïa ka jingjop ha ka Under-16 Boys Football League 2023-24 ba la pynïaid da ka Shillong Sports Association.
Ha kane ka jingïakhun kaba ka long ha ka lah sngi U Blei ha SSA Stadium Polo, ka Shillong Soccer Scout ka la pynjem khnap ïa ka Umpling SC da 9-1 kol bad u Sholinstar Syngkli u la khur ïa ka hat-trick.
U Sholinstar Syngkli u la thep lai kol ha ka minit kaba 10, 23 & 44 na ka bynta ban khur ïa ka hat-trick, ïa ki ar kol la thep da u Prosperwell Ryntong (9 & 42), katba ïa ki shi kol la thep da u Kevin B Swer (21), Newbirtson Syngkli (25), Leonel Lyngdoh (28) & Medon Nongrum (31). Ïa ka shi kol na ka Umpling la thep da u Wanteikupar Shangpliang ha ka minit kaba 33.
Ha ka jingïakhun kaba ar, ka Lumshyiap SC ka la shah rem noh ha ka Rangdajied United FC da 1-3 kol. U Bantiplang Khongnoh u la thep ar kol ha ka minit kaba 32 & 40 bad u Bakhrawbok Khar -akor (10). Katba ïa ka shi kol na ka Lumshyiap la thep da u Vivan Rani (13).
Ka Lah Bet SC ka la pynliem noh ïa ka Upper Shillong Colt da 3-1 kol. Ïa kine la thep da u Robindor Kyrstang ha ka minit kaba 8, Arkiman -bha Nongkhlaw (53) bad u Nangteibanskhembha Kharbangar (56). Hynrei ka Upper Shillong ka la lah ban pynphai kylla lyngba u Kerryson Khyriem (26).
Haba phai sha kawei pat ka jingïakhun kaba khatduh, ka Umphyrnai SC ka la pynliem noh ïa ka Ïaitylli SC da 4-1 kol. Ïa kine la thep da u Vickyson Wankhar ha ka minit kaba 13, Ïarapkyrmen Kharkongor (22), Banïar Kharsahnoh (32) bad u Nathan Kharbuli (33). Hynrei ka Ïaitylli ka la lah ban pynphai kylla shi kol lyngba u Donestar Mylliemngap (12).
