Abuja, K’lyngkot:
U Myntri ka tnat kam bar ri jong ka India- u S.Jaishankar haba ai jingkren na ka liang ka India hapoh Nigeria ha ka Sngi U Blei, u la ong ba ka India mynta ka sngew sarong ia ki rukom im, rukom leh bad ha ki liang baroh kiba la pynpaw bad pynsah nam ia ka haduh kine ki sngi mynta.
U Jaishankar u la leit poi sha Nigeria na ka bynta ka jingialang Non-Aligned Movement (NAM) Summit kaba la pynbeit ban long ha Uganda. U la kren ia kitei ki kyntien ha ka por ba u leit ban jurip ia ki jaka ba shong ki nong India ha katei ka ri.
Kumta, ha katei ka sngi u Jaishankar u la ong ba ka India ha kane ka por ka nud ban ong ba ka sngew sarong namar ki rukom im bad jinglong jong ka kiba la pynsah nam hapoh ka thoh-ka tar baroh kawei naduh ki rukom im, rukom rep bad ha baroh ki liang.
Namar u la ong ruh ba ha ka pyrthei, ki don tang katto- katne ki jaitbynriew kiba dang lah ban pynneh bad pynsah tad haduh kane ka juk ba mynta hynrei ka India ka long kawei napdeng kita kiba la lah ban iaid shakhmat bad ban pynneh bad pynkhraw shuh shuh ia ki riti- ki dustur bad ban kyntiew ia ki kam ki jam bad ka jinglong- jingman haduh ban da kot ia ki bor jong kane ka juk jingstad jong kane ka juk ba mynta.
Haba iadei pat bad ka jingiadei hapdeng ka India bad ka Nigeria, u Jaishankar u la ong ba kine ki arliang ri ki don ia ka jingiadei kaba skhem naduh ki por ba la leit bad kan dang iai bteng ruh ia kane. Ha kajuh ka por ruh u la ong ba ka India ka khot sngewbha ia ki kompeni bad ki tnat bapher na Nigeria ba kin wan ban iatrei lang bad ka India bad kin pynheh ia ki kam- ki jam jongki hapoh India.
La ong ba u Jaishankar un long kum u nongialam ‘Co-chair’ ha katei ka jing-ialang ba hynriew jong ka Joint Commision Meeting (JCM) hapdeng ki nongialam ka India bad ka Nigeria bad ban ïadon bynta ruh da kiwei pat ki nongialam bapher.
Ha katei ka jingleit jong u, un leit ruh ban plie ia ka jingialang Nigeria- India Buisiness Council bad un sa leit ban ai jingkren ha ka Nigerian Institute of International Affairs bad kumjuh ruh ban iashong pyrkhat kam bad ki heh nongkhaïi bad ki heh jong ka ri Nigeria hadien ynda la pyndep ia kitei ki jingialang.
