Shillong, K’Lyngkot 22
Kawei na ki nongsiat khnam na West Jaiñtia Hills District, ka samla Damanda Shisha Pasi ka la pynpaw ïa ka jingsngewkmen halor ka rukom pynkhreh bad pynbit pynbiang ïa ka 5th Meghalaya Games 2024 kaba la kut dangshen ha Tura, West Garo Hills District.
Kane ka ‘thei ïalehkai ka la pynpaw ba ka rukom pynkhreh ka long syriem kum ha ki lympung bah ka pyrthei ne World Cup naduh ka jingbuh ïa ki nongpynbeit por (timer), ki coach bad ki nongbishar (judges) bad kiwei kiwei.
Ka Damanda kaba dangshah pyntbit hapoh ka National Centre of Excellence (NCoE) kaba ha Sonapur, la pynpaw ïa ka jingsngewkmen halor ka jingmih ki nongïalehkai siatkhnam katba nangmih ki sngi lyngba ka jjngtrei shitom ki coach ban sei ïa ki nongïalehkai kiba don ïa ki sap ba kyrpang ha kane ka jingïalehkai.
“Nga sngew ban ai ka jingsngewnguh ïa i Miss, Bansara iba la trei shitom met bad mynsiem na ka bynta ban sei ïa ki nongialehkai siatkhnam kiba kynsai. Ha ki por kiba mynshuwa ngi dangduna bha ki nongïalehkai siat khnam, hynrei mynta ki la donkumba 40 ngut ki khynnah kiba la mihkhmat shakhmat ban pynpaw ïa ki sap ka kyrpang ha kane ka jingïalehkai.”
“Watla ki tiar ïalehkai siatkhnam ki long kiba rem dor kiba lah ban kot shaduh 3 lak shiteng eiei, hynrei nga pynpaw ka jingkmen ba na ka liang ka Sorkar Jylla ka la ïarap ban pynbiang ïa ki na ka bynta ki nongïalehkai,” ka la bynrap.
Kane ka nongialehkai kaba la mihkhmat ïa ka West Jaiñtia Hills District ha ka 5th Meghalaya Games ha Tura, ka la khur ïa ka takma ksiar ha ka Recurve (Olympic Round 70mts) bad Mixed Team ba la ïashim bynta lang bad u Kermeki Biam, katba ïa ka takma rupa ha ka Recurve Individual.
