Shillong, K’Lyngkot 22
Ka Meghalaya Athletics Association (MAA) ka la pynthymmai ïa ki nong-kitkam na ka bynta ka samoi treikam kaba saw snem kynthih ha kaba ka Kong M. Ampareen Lyngdoh lem bad u Bah Finely L. Pariat ki la ïai bteng ban bat biang ïa ka kam President bad Secretary.
Ïa kane la pynlong ha ka jingïalang jong ka Annual General Meeting ha ka 18 tarik ha Tura. Kane ka long ruh ka sien kaba nyngkong eh ba ka synjuk ka la lah ban pynlong ïa ka jingpynthymmai ïa ki nongkitkam shabar na ka nongbah Shillong.
Kat kum ka kyrwoh la ong ba ha katei ka jingïalang la pynlong ka jingïamir jingmut lang kaba kham kongsan ka long halor ka jingthmu ban kyntiew shuh shuh ïa ka jingïalehkai athletic da kaba ailad ïa ki khynnah ba kin ïoh ban ïashim bynta ha ka National Inter Districts Junior Athletics Meet. Kane ka NIDJAM ka dei kaba ju pynlong manla u snem na ka bynta ban plie lad ïa ki nongïalehkai na kylleng ki district.
Ïa ka jingïalang la pynïaid da u Bah EMH Passah, Sr Vice president ha kaba u N.A Mhonso Ngullie u la long kum u nongpeit pyrman uba la wan mihkhmat na ka Athletics Federation of India bad uba long ruh u General Secretary ka Nagaland Athletics Association bad u Bah P. Passah (MCS) u la long kum u nongpeit pyrman jong ka MSOA na ka bynta ban pynlong ïa katei ka prokram kaba ïaid beit ïaid ryntih.
Ha kane ka jingïalang ym shym la don kiba ïakhun na ka bynta kitei ki kam. Te kumta da kawei ka jingmut la ïarai lang da kaba pynkhamti da kijuh ki nongkitkam kiba rim bad ba kin shimti biang na ka bynta ka samoi treikam naduh u 2024 haduh 2028.
Ïa ka kam Sr. Vice President la shimti da u Bah E.M.H. Passah (West Jaiñtia Hills), Vice President u Salja Marak (West Garo Hills), Bah Dipshon Ryntathiang (Ri Bhoi) bad u Bah Joey Marbaniang (East Khasi Hills). Sr. Jt. Secretary Kong Daisy Marweiñ (East Khasi Hills), Jt. Secretary Bah Patrick Lamare (West Jaiñtia Hills), Jt. Secretary Bah Pleasantly Synnah (West Jaintia Hills), Treasurer P. Rapthap (East Khasi Hills). Katba ki Executive Member ki long Y.G. Lyngdoh (West Khasi Hills), G.J.L. Sangriang (South West Khasi Hills), Beltish Sangma (East Garo Hills) & James Sutnga (East Jaiñtia Hills).
