Jerusalem, K’lyngkot:
Ki shipai jong ka Israel ha ka Sngi U Blei ki la pynbna ia ka jingkhlad jong uwei pat u shipai ha ka jingleit thombor jong ki lehnoh Hamas ha ka 7 tarik u Risaw kaba dang shu dep pyntikna ha kane ka kynti hadien ba la shem ia ka met jong utei u shipai ba khlad napoh Gaza Strip bad uba la shah rahbor bad shah bat ha ki lehnoh Hamas naduh katei ka por.
Utei u shipai Shay Levinson, 19 snem ka rta, la ong ba u la khlad noh ha katei kajuh ka sngi jong ka jingleit hiar thma ki lehnoh Hamas pyrshah ia ka Israel. La ong ba utei u shipai samla u la khlad ha ka kti ki lehnoh Hamas kiba la rahbor ia u na Israel hadien ba ki la ioh ban leit rung sha ki bynta khappud jong ka Israel.
Da kane, ka jingïap jong kito kiba shah rahbor ha ki lehnoh Hamas ka la kiew sha ka 28 ngut tad haduh jong kane ka Lah Sngi U Blei ba la ioh ia kane ka jingkheiñ na ka kaiphod ba thymmai ba la pyllait da ki shipai Israel ha kane ka kynti.
Ki heh shipai ka Israel ki la iathuh ba u Levinson u shong u sah ha ki bynta ka thaiñ Shatei ha kawei ka shnong kaba don ha ki thaiñ ka Givat Avni bad u don hapoh ka kam kaba u dei ban kmih bad pahara ha kitei ki thaiñ.
Naduh katei ka 7 tarik hi ba ka Israel ka la sakhi ia ka jingshah thombor bad ka jingshah pyniap dusmon ha ki lehnoh ka Palestine kiba synshar hi ia ka nongbah Gaza baroh shi katta, ka Israel ka la khie bitar bad ka la smai ba kan kput bad kan ym ailad ia katei ka kynhun lehnoh ba kan dang sah kyrteng ha kane ka sla pyrthei bad ka la kular ruh ba kan pynduh jait noh syndon ia katei ka kynhun lehnoh Hamas ha kane ka sien mynta.
Namar ym tang ba ki lehnoh Hamas ki la leit hiar thma ia ka Israel ha katei ka sngi hynrei ki la rahbor ruh sa ia ki 250 ngut ki briew na Israel bad ki la pyniap dusmon ia ki khyllung- khynnah bad kat kiba don ha ka lynti iaid jongki ha katei ka jingleit hiar thma jongki sha Israel.
Kumjuh ruh na ka liang ka Israel ka la pynhiar kput ia kitei ki lehnoh da kaba ther bom naphang sha Gaza Strip naduh katei ka por. Kane ka jingther bom jong ka Israel pat ka la ktah jur ia ki paid nongshong shnong ba lui-lui jong ka Gaza ha kaba ka jingdon kiba khlad ka la kiew shaduh ka 25 hajar tam kiba kham bun ki dei ki kynthei bad ki khyllung- khynnah ki bym don dak eiei bad ki bym don jing-iadei eiei bad kitei ki lehnoh kiba ka Israel ka shun bad thmu ban pynhiar kput.
