Shillong, K’Lyngkot 22
Ka kynhun ïalehkai phutbol U-19 ka Jylla kan pynkhreh ban ïakhun nyngkong ha ka Khelo India Youth Games 2024 pyrshah ïa ka Uttar Pradesh ha ka sngi Ba-ar ha Tamil Nadu.
Kane ka jingïakhun kan long ha ka por 9 baje mynstep ha Madras University.
Ha kane ka jingïakhun ka Meghalaya ka la don ha ka Group-A kaba kynthup ïa ka Uttar Pradesh, Punjab, bad ka Tamil Nadu (kaba dei ka kynhun ba ïoh pynlong ïa kane ka lympung). Katba ha ka Group-B ki long ka West Bengal, Jharkhand, Goa bad ka Odisha.
Kumba ka paw kine ki hynñiew tylli ki kynhun lait noh ka Tamil Nadu, ki dei kiba la shah jied lyngba ka jinglah ban ïalehkai bha ha ka BC Roy Trophy jong u snem ba la lah.
Lah ban pynkynmaw ba ka Meghalaya ka la ïoh rung sha ka semi final ha ka Khelo India kaba la long ha 2022 bad kumjuh ha u 2023 hadien ba ka la shah rem noh ha ka Kerala na ka bynta ban pynlong ïa ka kynhun ïalehkai Jylla ba kan khur ïa ka takma rnong.
Te kumta kane ka kynhun hapoh ka jingïalam u Jeffrey Warlarpih (coach) ka la khmih lynti ban ïalehkai bha ha kane ka lympung khnang ba kan nanglah ban jam shaphrang.
Kiwei pat ki ar tylli ki jingïalehkai jong ka Meghalaya kin long ha ka 25 tarik pyrshah ïa ka Punjab bad ia ka Tamil Nadu ha ka 27 tarik mynta u bnai.
